अख्तियारका प्रवक्ता भोला दाहाल जलहरी हेर्न पुगे पशुपति

• दुई वर्षअघि राखिएको जलहरी निकालेर तौल लिन सुरु गरेको छ
• अख्तियारका प्रवक्ता भोला दाहाल जलहरीबारे अनुसन्धान गर्न पशुपतिनाथ पुगे
• १०८ किलोको जलहरी निर्माण गरिएको उल्लेख छ

काठमाडौं ।।

आइतबार अपरान्ह पशुपति पुगेको अख्तियार दुरुपयोग अनुसन्धान आयोगको टोलीले पशुपतिनाथ मन्दिरमा दुई वर्षअघि राखिएको जलहरी निकालेर तौल लिन सुरु गरेको छ ।

सहसचिव शेरजंग कार्की नेतृत्वको टोलीमा अख्तियारकै प्रहरी, सुनचाँदीका कालिगढ र काठमाडौं महानगरपालिकाको वडा कार्यालयका प्रतिनिधिहरु पनि छन् । अख्तियारका प्रवक्ता भोला दाहालले जलहरीबारे अनुसन्धानको सिलसिलामा पशुपतिनाथ मन्दिरमा पुगेको बताएका छन् ।

दुई वर्षअघि तत्कालिन प्रधानमन्त्री केपी शर्मा ओली पशुपति दर्शन गर्न गएका बेला सुनको जलहरी राख्ने र त्यसका लागि सरकारले ३० करोड रुपैयाँ दिने घोषणा गरेपछि यसको प्रक्रिया अघि बढेको थियो । पशुपतिनाथको शिवलिंगमा चढाइने अर्घ्य, जल तथा पञ्चामृत खस्ने भागमा लगाइने धातुको पाता नै जलहरी हो ।

प्रधानमन्त्रीको घोषणापछि जलहरी निर्माणका लागि १०० किलो ४९३ ग्राम सुन आवश्यक पर्ने र त्यति सुनले जलहरी, जलधारा, नाग, नागमूर्ति, सुनको किला लगायत आवश्यक सामान बनाउन पुग्ने पशुपति क्षेत्र विकास कोषले अनुमान गरेको थियो ।

राष्ट्रपति विद्यादेवी भण्डारीले २०७७ फागुन १२ मा जलहरी राख्न क्षमापूजा गर्दा १०८ किलोको जलहरी निर्माण गरिएको उल्लेख भएको ब्यानर राखिएको थियो । चाँदीको जलहरी भएको ठाउँमा सुनको राख्ने सरकारको निर्णयमा विवाद भएपछि सर्वोच्च अदालतमा पनि मुद्दा परेको थियो । मुद्दाको सुनुवाइ हुने दिन नै तत्कालिन राष्ट्रपतिबाट जलहरी उद्घाटन गरिएको थियो ।

• संसद विघटन