धारिलो हतियार प्रहारबाट बूढानीलकण्ठमा एक महिलाको मृत्यु
३८ वर्षीया अनिता चौधरीको मृत्यु
घटनाबारे थप अनुसन्धान हुँदै
काठमाडौं ।।
धारिलो हतियार प्रहारबाट काठमाडौंमा एक महिलाको मृत्यु भएको छ । बूढानीलकण्ठ नगरपालिका-४, भसन्थलीमा बस्दै आएकी सप्तरीकी ३८ वर्षीया अनिता चौधरीको मृत्यु भएको हो ।
प्रहरीका अनुसार बूढानीलकण्ठ-४ मै बस्दै आएका ५२ वर्षीय गौरासिंह बोहराले गएको आइतबार राति धारिलो हतियारले प्रहार गर्दा उनी गम्भीर घाइते भएकी थिइन् ।
उनलाई उपचारका लागि महाराजगन्जस्थित त्रिवि शिक्षण अस्पतालमा ल्याइएको थियो । त्यहाँबाट थप उपचारका लागि राष्ट्रिय ट्रमा सेन्टरमा ल्याइएको थियो ।
उपचारका क्रममा गए राति उनको मृत्यु भएको प्रहरीले जनाएको छ । आरोपित बोहरालाई प्रहरीले पक्राउ गरेको छ । घटनाबारे थप अनुसन्धान भइरहेको प्रहरीले जनाएको छ ।
