तामाकोशीमा माछा मार्न गएका १४ वर्षीय तिरिस पहिरोमा हराए
साझा परिवेश
बुधबार, साउन २४, २०८० ११:४९
माछा मार्न गएका तिरिस पहिरोमा पुरिए
१४ वर्षीय तामाङ साँझ ६ बजेतिर माछा मार्न गएका फर्किएनन्
पहिरो हटाएर निकाल्ने प्रयास जारी
दोलखा । रन्जना काफ्ले ।।
खुशी हुँदै तामाकोशी किनारमा माछा मार्न गएका तिरिस पहिरोमा पुरिएका छन् । बिगु-२ का १४ वर्षीय तिरिस तामाङ साँझ ६ बजेतिर माछा मार्न गएका बेला पहिरोमा पुरिएका हुन् । जिल्ला प्रहरी कार्यालय दोलखाका सूचना अधिकारी बिश्वास भण्डारीका अनुसार पहिरोमा पुरिएका तामाङलाई पहिरो हटाएर निकाल्ने प्रयास भइरहेको छ ।
अरु तीन जना साथीसँग तिरिस तामाङ माछा मार्न भनेर तामाकोशी गएका थिए । एक्काशी एक सय मिटर माथिबाट पहिरो खसेपछि उनी पुरिए । उनका साथीहरु भने भागेर ज्यान जोगाउन सफल भएका सूचना अधिकारी भण्डारीले जानकारी दिए ।
‘राति ९ बजेतिर प्रहरीलाई जानकारी भयो । रातिको बेला भएकाले तिरिसलाई खोज्न असहज भएकोले हिजो फेला परेनन् । आज बिहान भने पहिरोमा पुरिएको अवस्थामा उनको खुट्टा देखिएकोले खोज्नलाई पहिरो पन्छाउने काम भइरहेको छ,’ उनले भने ।
पहिरोमा पुरिएका तामाङलाई बाहिर निकाल्ने प्रयास भइरहेको छ । जिल्ला प्रहरी कार्यालयले इन्सपेक्टर राजेश सिग्देलको टोलीलाई घटनास्थलतर्फ परिचालित गरिएको जनाएको छ ।
