झापा जिल्लाको दमक मालपोत कार्यालयले अनेक बहानामा सेवाग्राहीलाई दुख दिने गरेको गुनासो बढ्न थालेको छ । अधिकृत वारेसनामाबाट जग्गा रजिष्ट्रेसन पास गर्दा हप्तौं सम्म पनि काम नहुने गरको त्यहाँका लेखापढी व्यवशायीहरु बताउछन् ।
जग्गा खरिद विक्रीको लागि जग्गा धनी स्वयम उपस्थित हुन नसकेको अवस्थामा गरिने अधिकृत वारेसनामा जिल्ला अदालतबाट माननीय न्यायाधिसको रोहवारमा सबै कानुनी प्रकृया पुरा गरेर गरिने भएकोले सबैभन्दा भरपर्दो हुने लेखापढी व्यवशायी इन्द्रमणी पोख्रेल बताउछन् ।
यसरी काम गर्दा हप्तौं सम्म पनि काम नभएको गुनासोे आएपछि दमक मालपोत कार्यालयमा सम्पर्क गर्दा नक्कली कागजातबाट सावधानी अपनाउनलाई यसो गरिएको बताउछन् । जुन जिल्लाबाट वारेसनामा बनाएको छ सोही जिल्ला अदालतमा कागजातको आधिकारिकताको बारेमा बुझ्नु पर्ने भएकोले सेवाग्राहीको आफ्नो मान्छे सम्वन्धित अदालतमा नपठाए हप्तौं सम्म पनि जवाफ नआउने कार्यालयका कर्मचारी बताउछन् ।
यस विषयमा कानुनी अवस्था के हो भनी कानुन व्यवशायी अधिवक्ता सुधिर तिम्सिनासँग जिज्ञासा राख्दा जिल्ला अदालतले अधिकृत वारेसनामा दिनु पूर्व नै सम्वन्धित मालपोत कार्यालयसँग श्रेस्ता भिडाउने क्रममा दोहोरो पत्राचार हुने भएकोले यसो गर्नु सेवाग्राहीलार्ई दुख दिने कार्य मात्र भएको बताउछन् ।
सबै कागजात पु¥याएर काम गर्दा पनि मालपोत अधिकृत हर्कबहादुर राईले प्रमाणित गर्ने बेलामा अनेक बहानामा दुख दिने गरेको अधिकांश सेवाग्राहीहरुको गुनासो रहेको छ । कोही अधिकृत सरको बानी नै त्यस्तै हो भनेर चित्त बुझउने गरेका छन् भने कसै कसैले घुसको वार्गेनिङको लागि त्यसो गरेको हुनसक्ने आशंका व्यक्त गर्ने गरेका छन् ।
