टीकापुर घटनामा दोषी ठहर भइ जेलमा रहेकाहरुलाई रिहा गर्न माग
अध्यक्ष चन्द्रप्रसाद चौधरीले टीकापुर घटनालाई गम्भीर रुपमा नलिए फेरि अर्को विद्रोह हुन सक्ने चेतावनी
काठमाडौं ।।
८ वर्षअघि कैलालीको टीकापुरमा भएको थरुहट थारुवान आन्दोलनलाई बिहीबार थारू कल्याणकारिणी सभा र थरूहट थारूवान संयुक्त संघर्ष समितिले विद्रोह सभाको रुपमा सम्झना गरेको छ । २०७२ साल भदौ ७ गते कैलालीको टीकापुरमा थरुहटरथारुवान आन्दोलनका क्रममा थारु समुदायमाथि आक्रमण भएको विरोधमा टीकापुर विद्रोह सभाको रुपमा मनाएको थारु कल्याणकारिणी सभाको उपत्यका आन्दोलन परिचालन समितिका संयोजक सुमन चौधरीले बताए ।
उनीहरूले टीकापुर घटनाका क्रममा लगाइएका झुठा मुद्दा फिर्ता गर्नुपर्ने र थारू कल्याणकारिणीसभा लगायतका थारू संघ संस्थासँग विभिन्न समयमा भएका सम्झौता कार्यान्वयन गर्न माग गरेका छन् । थारू कल्याणकारिणी सभाका महामन्त्री प्रेमीलाल चौधरीले टीकापुर घटनामा दोषी ठहर भइ जेलमा रहेकाहरुलाई रिहा गर्न माग गरे ।
टीकापुर घटना थारू समुदायको हक अधिकार र पहिचानलाई स्थापित गराउने आन्दोलन भन्दै उनले भने, ‘तर राज्यले थारूमाथि चरम दमन गर्यो र अधिकार माग्नेलाई जेल हाल्यो । उनीहरूको चाँडै रिहाइ होस् ।’ नेपाल आदिवासी जनजाति विद्यार्थी महासंघका अध्यक्ष चन्द्रप्रसाद चौधरीले टीकापुर घटनालाई गम्भीर रुपमा नलिए फेरि अर्को विद्रोह हुन सक्ने चेतावनी दिए ।
बिहीबार नै कैलालीको टीकापुरमा आयोजित कार्यक्रममा थारु अगुवा तथा विभिन्न राजनीतिक दलका नेताहरु सहभागी भए । उनीहरुले टीकापुर घटनालाई राज्यले राजनीतिक घटनाका रुपमा लिएर सबै बन्दीलाई रिहा गर्नुपर्ने उनीहरुको माग छ । संविधान निर्माणका बेला थरुहट थारुवान छुट्टै प्रदेश हुनुपर्ने माग गर्दै कैलालीको टीकापुरमा थारु समुदायले आन्दोलन गरेका थिए ।
त्यस क्रममा आन्दोलनकारी पक्षबाट भएको आक्रमणमा परी नेपाल प्रहरीका एसएसपी लक्ष्मण न्यौपानेसहित ७ सुरक्षाकर्मी र एक बालकको हत्या भएको थियो । यो घटनामा दोषी ठहर भएका रेशम चौधरी पाँच वर्ष जेल परेपछि गत १५ जेठमा राष्ट्रपतिबाट आममाफी पाएर रिहा भए भने सोही घटनाका कतिपय दोषीहरु जेलमै छन् ।
