स्थानिय भाषामा लाखे मार्ने कार्यक्रम गरी समापन गर्ने
लाखेजात्रा सञ्चालन समितिले अन्तर्राष्ट्रिय गोल्डकप फुटवल पनि खेलाउदै
ताप्लेजुङ। गणेश कुमार श्रेष्ठ ।।
ताप्लेजुङको प्रमुख पर्वको रुपमा सदिऔं देखि मनाइदै आएको लाखे जात्रा पर्व यस वर्ष भव्य र सभ्य रुपमा मनाईदैछ । विशेष गरेर नेवार समुदायको प्रमुख जात्राको रुपमा मनाइने लाखे जात्रा ताप्लेजुङमा भने फरक तरिकाले मनाइदै आएको छ ।
श्रावण कृष्ण चतुर्दशी जसलाई घण्टाकर्ण चतुर्दशी पनि भन्ने गरिन्छ । सोहि दिनदेखि घण्टाकर्ण राक्षसलाई मृत्युवरण गरेको सम्झनामा उक्त रक्षसको प्रतिकको रुपमा कृष्ण जन्माष्टमीसम्म लाखे नाच प्रदर्शन गरी मनाउने गरिन्छ भने भोलीपल्ट नवमीको दिन श्री कृष्ण लिला प्रदर्शन जसलाई स्थानिय भाषामा लाखे मार्ने कार्यक्रम गरी समापन गर्ने गरिन्छ ।
ताप्लेजुङमा रक्षावन्धन जनै पूर्णिमाका दिन देखि गाईजात्रा र रोपाई जात्रा ३ दिन सम्म मेला लगाइ लाखेजात्रा पर्व मनाइदै आएको र उक्त जात्रा कुनै जात विशेषको नभएर ताप्लेजुङको जात्राको रुपमा मनाइने गरिएको र उक्त जात्रा हेर्न छिमेकी जिल्लाहरु बाट पनि मानिसहरु आउने गरेको आदिवासी जनजाती महासंघका सचिव कुमार खवास बताउनु हुन्छ ।
अझ रोचक कुरा के छ भने लिम्वुवान क्षेत्र भएकोले पहिला पहिला त लिम्वु जातीहरु लाखेजात्रा मेलामा तरुनी तन्नेरी भेट गरेर लिम्वु संस्कृति धान नाचेर विहावारी समेत हुने गरेको अग्रजहरु बताउने गर्छन् ।
यस पर्वको अवसरमा लाखेजात्रा सञ्चालन समितिले अन्तर्राष्ट्रिय गोल्डकप फुटवल खेलाउदै आएको छ । उक्त खेलको आज जनै पूणिमाको अवसरबाट शुभारम्भ भई यहि भाद्र २० गते फाइनल खेल हुने समेत लाखेजात्रा सञ्चालन समितिका संयोजक देवराज गुरुङले जानकारी दिनुभयो ।
उक्त अवसरमा फुङलिङ नगरपालिका वार्ड नं. ५ को पहलमा विरेन्द्र युवा क्लबको सहजीकरणमा विरेन्द्र चौकमा खाद्य परिकार स्टल सहित विभिन्न मनोरञ्जनात्मक कार्यक्रम, हाउजी खेल, लाखेनाच, धान नाच, गायन तथा नृत्य कार्यक्रम जात्रा भरी हरेक साँझ सञ्चालन हुने संस्थाका अध्यक्ष लक्ष्मी काफ्लेले जानकारी दिनुभयो ।
