सञ्चालनपछी एक भगवत् र एक गीता, नांगो गाउँ, जवान र नन् २ प्रदर्शन हुने
दीपक-दीपा मंसिरदेखि नयाँ फिल्मको छायांकनमा व्यस्त हुने
काठमाडौं ।।
दीपकराज गिरी, दीपाश्री निरौला र निर्मल शर्मा सञ्चालक रहेको मल्टिप्लेक्स फिल्म हल आज शुक्रबारदेखि औपचारिक सञ्चालनमा आउँदैछ । नयाँ बानेश्वर चोकस्थित एनबी सेन्टरमा रहेको हल आईएनआई सिनेमाजको फ्रेन्चाइजीको रुपमा सञ्चालनमा आउन लागेको हो ।
दुई पर्दा रहेको हलमा कुल ३८७ सिट क्षमता छ । स्क्रिनप्ले फिल्म्स कम्पनीको स्वामित्व रहेको यो हलको सबै व्यस्थापन आईएनआईले हेर्नेछ । यो हलसँगै आईएनआईको हल संख्या तीन पुगेको छ । गोंगबुको ल्होत्से मल, बुटवलको मिलनचोकमा यसअघि नै दुई फ्रेन्चाइजी हल सञ्चालनमा छन् ।
शुक्रबार बिहान यो हलको उद्घाटन कार्यक्रम छ । उद्घाटनमा दीपक–दीपाकै पछिल्लो फिल्म ‘छक्कापञ्जा ४’ को स्क्रिनिङ हुनेछ । त्यसपछि नियमित शो अन्तर्गत एक भगवत् र एक गीता, नांगो गाउँ, जवान र नन् २ प्रदर्शन हुनेछन् ।
‘हामी निर्माता पनि भएकाले विदेशीभन्दा नेपाली फिल्मलाई नै शो विभाजनमा प्राथमिकता दिनेछौं,’ हल सञ्चालनको दौडधुपमा रहेका दीपकले भने, ‘यदि म प्रदर्शकको रुपमा सफल रहें भने भोलि देशव्यापी रुपमा फ्रेन्चाइजी विस्तार पनि हुनेछ ।’
निर्माण सुरु भएको पाँच वर्षपछि अन्ततः हल सञ्चालनमा आउन लागेको हो । कोभिड र आर्थिक संकटको कारण हललाई समयमै ल्याउन नसकिएको दीपकले बताए । यसबाहेक दीपक-दीपा मंसिरदेखि नयाँ फिल्मको छायांकनमा व्यस्त हुनेछन् ।
