हामि आफैंले व्यवस्थालाई दोष दिन मिल्दैन : मन्त्री गुरुङ

• सहरी विकासमन्त्री सीता गुरुङले व्यवस्थालाई दोष दिने बेला हैन 
• झन्डै ४० वटा संघीय कानुन बनाइसकेपछि अहिले भएका समस्या समाधान हुने
• कार्यान्वयनकै चरणमा सबै कुरा भएन भन्ने हो भने त्यो गलत हो 

काठमाडौं ।।

सहरी विकासमन्त्री सीता गुरुङले व्यवस्थालाई दोष दिने बेला नभएको बताएकी छन् । सोमबार ललितपुरमा बसोबास दिवसको अवसरमा आयोजित कार्यक्रमलाई सम्बोधन गर्दै उनले संघीयता प्राप्त गरे पनि कानुनी रुपमा, संवैधानिक रुपमा व्यवस्था गरे पनि अहिले व्यावहारिक रुपमा कार्यान्वयन गर्न नसकेको बताइन् । झन्डै ४० वटा संघीय कानुन बनाइसकेपछि अहिले भएका समस्या समाधान हुने उनले दाबी गरिन् । कार्यान्वयनकै चरणमा सबै कुरा भएन भन्ने हो भने गलत हुने भन्दै उनले आम नागरिकको चासो सहरकेन्द्रित हुन थालेको बताइन् ।

“हामीले अहिले नै व्यवस्थालाई दोष दिने बेला भएको छैन । झन्डै ४० वटा यस्तै प्रकृतिका र यस्तै समस्या समाधान गर्ने ऐन, कानुनहरु बनाउन बाँकी छ । त्यो हिसाबले पनि हामी कार्यान्वयनकै चरणमा छौँ,” उनले भनिन्, “कार्यान्वयनकै चरणमा सबै कुरा भएन भन्ने हो भने गलत हुन्छ होला ।”

मन्त्री गुरुङले स्मार्ट सिटी, सुरक्षित नागरिक आवास, एकीकृत बस्ती विकासको योजना अघि सारे पनि कार्यान्वयन लैजान नसकिएको स्वीकार गरिन् । उनले स्मार्ट सिटी, सुरक्षित नागरिक आवास, एकीकृत बस्ती विकासको योजना अघि बढाउन बजेट पर्याप्त नभएको गुनासो गरिन् ।मन्त्री गुरुङले बनेका सहरलाई व्यवस्थित गर्ने र बन्ने सहरको संरचनाबारे पहिल्यै ध्यान दिनुपर्ने आवश्यकता रहेको बताइन् । सबै पालिकामा सहर निर्माणको बेसलाइन योजनाबारे आवश्यक अध्ययन हुन जरुरी रहेको बताइन् ।

• संसद विघटन