दोलखाको तामाकोसी किनारमा चप्पल र लुगा, वृद्ध बेपत्ता
साझा परिवेश
बुधबार, अशोज १७, २०८० १६:३३
दोलखामा ९१ वर्षका वृद्ध बेपत्ता
९१ वर्षीय महेश्वर रिमाल मंगलबारदेखि हराए
नदीमा हालफालेको हुनसक्ने अनुमान
कसैलाई जानकारी नदिई हिँडेका
प्रहरीको टोली खोजीकार्यमा व्यस्त
काठमाडौँ ।।
दोलखामा ९१ वर्षका वृद्ध बेपत्ता भएका छन्।जिल्लाको भीमेश्वर नगरपालिका-५ तामाकोसीका ९१ वर्षीय महेश्वर रिमाल मंगलबारदेखि हराइरहेका हुन्। प्रदेश प्रहरी कार्यालयका अनुसार खोजीका क्रममा तामाकोसी गाउँपालिका १ स्थित तामाकोसी नदीको दोभानमा उनका चप्पल, स्टकोट, गलबन्दी र लौरो भने फेला परेका छन्।
उनले त्यही नदीमा हालफालेको हुनसक्ने अनुमान गरिएको छ। मंगलबार बिहान ९ बजेतिर घरमा कसैलाई जानकारी नदिई हिँडेका रिमाललाई स्थानीयले खोजतलास गर्दा साँझसम्म पनि नभेटेपछि प्रहरीलाई खबर गरेका थिए। प्रहरी चौकी किरातीछापबाट प्रहरी सहायक निरीक्षकको नेतृत्वमा चारजनाको टोलीले उनको खोजी जारी राखेको छ।
