सीआईबीले गरिरहेको कामलाई जाँचबुझ आयोगले ख्याल गर्ने
अहिलेसम्म भएका तस्करीको अध्ययन गरेर रिपोर्ट दिनु चुनौती
आयोगलाई अदालत सरह अधिकार रहेकाले जो सुकैलाई पनि बोलाएको बेला आइदिन आग्रह
काठमाडौं ।।
सुनको अवैध तस्करी नियन्त्रणसम्बन्धी जाँचबुझ आयोगले सुन तस्करीबारे नेपाल प्रहरीको केन्द्रीय अनुसन्धान ब्यूरो (सीआईबी) ले अनुसन्धान गरिरहेका बेला आफूले अध्ययन नगर्ने बताएको छ । तर सीआईबीले अनुसन्धान सकेपछि त्यसमा कुनै कमीकमजोरी भएको छ कि छैन भनेर चाहिँ आयोगले हेर्ने छ । सरकारले हालै मात्र उच्च अदालतका पूर्व कामु मुख्य न्यायाधीश डिल्लीराज आचार्यको नेतृत्वमा चार सदस्यीय जाँचबुझ आयोग बनाएको थियो । आयोगको बुधबार बसेको पहिलो बैठकले आफ्नो कार्यादेशबारे सबैलाई जानकारी गराउने र कात्तिक १६ गतेसम्म सुझाव लिने निर्णय गरेको छ ।
अध्यक्ष आचार्यका अनुसार कार्यायोजना निर्माणका क्रममा आयोगलाई पैठारीबारे अध्ययन गर्ने भनेको, तर निकासीबारे नबोलेकाले अध्ययन सीमा के हुने भनेर समेत छलफल भएको छ । उनले अघि भने, ‘अहिलेसम्म भएका अनुसन्धान, विचाराधीन मुद्दा र सीआईबीले अनुसन्धान गरिरहेको विषयमा मुद्दामा पनि कमजोरी छ भने खोज भनेको छ । यो अर्को चुनौती हो ।’ सुन तस्करीको प्रवृत्तिमा दिनदिनै परिर्वतन भइरहेको भन्दै उनले अहिलेसम्म भएका तस्करीको अध्ययन गरेर रिपोर्ट दिनु चुनौतीपूर्ण रहेको बताए ।
सीआईबीको अनुसन्धानबारे तपाईंहरुको बझाई के हो भन्ने प्रश्नमा उनले भने, ‘सीआईबीले अहिले गरिरहेको विषयमा हाम्रो अध्ययनका क्रममा मुद्दा दर्ता गरिसक्छ । सीआईबीले अध्ययन गरिरहेकै क्रममा हामीले त्यहाँ गएर अध्ययन गर्ने होइन ।’ तर सीआईबीले गरेको अनुसन्धान चाहिँ ठीक भयो कि भएन भनेर चाहिँ हेर्ने अध्यक्ष आचार्यले बताए । आयोगलाई अदालत सरह अधिकार रहेकाले जो सुकैलाई पनि बोलाएको बेला आइदिन आग्रह गरे । नभए पक्राउ पूर्जी जारी गर्नसक्ने अधिकार रहेको उनले बताए ।
