यसपालि मुख्य दलका यी नेताले लगाउँदैनन् विजयादशमीकाे टीका

काठमाण्डाै – विजया दशमीको दिन आज राजनीतिक दलका नेताहरुले पनि आफन्त, नेता कार्यकर्ता र सर्वसाधारणलाई टीका जमरा लगाइदिँदैछन् । यसपटक केही मुख्य दलका केही मुख्य नेताहरुको भने टीका छैन ।

प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डकी पत्नी सीता दाहालको निधन भएका कारण उहाँले टीका नलगाउने हुनुभएको हो । उहाँले पारिवारिक भेटघाट मात्रै गर्ने कार्यक्रम छ । यस्तै, प्रमुख प्रतिपक्षी दल नेकपा एमालेका अध्यक्ष एवम् पूर्वप्रधानमन्त्री केपी शर्मा ओलीको पनि टीका छैन । उहाँकी ठूलीआमाको निधन भएको थियो ।

यस्तै, नेकपा एकीकृत समाजवादीका अध्यक्ष माधवकुमार नेपालले पनि सात महिना अघि भाइको निधनका कारण यसपटक दशैँको टीका नलगाउने हुनुभएको छ । तर नेपाली कांग्रेसका सभापति तथा पूर्व प्रधानमन्त्री शेरबहादुर देउवाले भने टीका लगाउनुहुनेछ । उहाँले निवासमै आफन्तसँगै पार्टीका नेता कार्यकर्तालाई पनि टीका लगाइदिने कार्यक्रम छ।

यस्तै, राष्ट्रिय प्रजातन्त्र पार्टीका अध्यक्ष राजेन्द्र लिङ्देनले झापाको निवासमै विजया दशमी मनाउँदै हुनुहुन्छ । यस्तै, राष्ट्रिय स्वतन्त्र पार्टी (रास्वपा) का सभापति रवि लामिछानेले काभ्रेपलाञ्चाेकमा दाजु भाउजुको हातबाट टीका लगाएपछि काठमाण्डाैमा आएर आफ्नो निवासमा टीका लगाउने र लगाइदिने कार्यक्रम छ।

• संसद विघटन