गाजामा युद्धविराम हुँदा हमासलाई फाइदा हुन्छ : ब्लिन्केन

• गाजामा युद्धविराम हुँदा हमासलाई सहयोग पुग्ने
• थप देशलाई नयाँ ‘मोर्चा’ खोल्नबाट रोक्न अमेरिकाले कदम चाल्ने
• गाजामा भएका हत्याका घटनालाई न्यायोचित बनाउन नसकिने

काठमाडौं ।।

अमेरिकी विदेशमन्त्री एन्टोनी ब्लिन्केनले गाजामा तत्काल युद्धविराम हुँदा हमासलाई आफ्नो सेना पुनः संगठित गर्न सहयोग पुग्ने बताएका छन् । जोर्डनको राजधानी अम्मानमा त्यहाँका विदेशमन्त्री अयमान सफादी र इजिप्टका विदेशमन्त्री सामेह शौकरीसँगको संयुक्त पत्रकार सम्मेलनमा उनले यस्तो टिप्पणी गरेका हुन् । उनले हमास आन्दोलनविरुद्ध आफ्नो रक्षा गर्ने इजरायलको अधिकारका निम्ति अमेरिकाको समर्थन र प्यालेस्टाइनी नागरिकको सुरक्षाको आवश्यकतामा जोड दिए । इजरायल-हमास द्वन्द्वमा कुनै पनि थप देशलाई नयाँ ‘मोर्चा’ खोल्नबाट रोक्न अमेरिकाले कदम चाल्ने उनले बताए ।

जोर्डनका विदेशमन्त्री सफादीले गाजामा तत्काल युद्धविराम र मानवीय सहायता पुर्‍याउन आवश्यक रहेको बताए । उनले गाजामा जारी इजरायली आक्रमणलाई आत्मरक्षाका रूपमा वर्णन गर्न अस्वीकार गरे । उनले प्यालेस्टाइनीलाई उनीहरूको भूमिबाट विस्थापित गर्ने कुनै पनि प्रयासलाई अस्वीकार गर्दै पश्चिम किनारको अवस्थाका बारेमा चिन्ता व्यक्त गरे ।

इजिप्टका विदेशमन्त्री समेह शौकरीले गाजामा भएका हत्याका घटनालाई न्यायोचित बनाउन नसकिने भन्दै बिनासर्त गाजामा तत्काल युद्धविराम गर्न आह्वान गरे । उनले इजरायललाई मानवीय सहायताको प्रवेशमा अवरोध नगर्न र घेरामा परेको एन्क्लेभमा सुरक्षित र द्रुत वितरण सुनिश्चित गर्न आग्रह गरे । जोर्डनले शनिबार अम्मानमा ब्लिन्केन र पाँच अरब देशका विदेशमन्त्रीहरू तथा प्यालेस्टाइन लिबरेसन अर्गनाइजेसनको कार्यकारी समितिका महासचिवसित छलफल गरिएको थियो ।

• संसद विघटन