सम्बन्धित निकायले ध्यान नदिँदा बालबालिकाको ज्यान नै जोखिममा
५ महिना अगाडि निर्माण थालिएको उक्त पुल निर्माण हुन सकेन
पुल नबन्दै जीर्ण अवस्थामा पुग्ने अवस्था भएकाे स्थानीयको गुनासो
कैलाली ।।
कैलालीको एक गाउँपालिकामा प्रशासन, प्रहरी पालिकालगायतका सम्बन्धित निकायले ध्यान नदिँदा बालबालिकाको ज्यान नै जोखिममा परेको छ। बर्दगोरिया गाउँपालिका वडा नम्बर २ र ३ जोड्ने कुइरा खोलामाथि निर्माणाधीन झोलुङ्गे पुलको लट्ठाले गर्दा बालबालिकाको ज्यान जोखिममा परेको बताइएको हाे । ५ महिना अगाडि निर्माण थालिएको उक्त पुल कछुवा गतिमा निर्माण हुँदा अहिले गोठालो जाने बालबालिकाहरु झुन्डिएर खेल्ने गरिरहेकाले बालबालिकाको ज्यान जोखिममा परेको छ भने पुल चाहिं नबन्दै जीर्ण अवस्थामा पुग्ने भएकाे स्थानीयको गुनासो छ।
“गाई बाख्रा चराउनको लागि बच्चाहरु आउँछन् । दिनहुुँ लट्ठामा झुन्डिएर खेल्छन् । लट्ठाबाट हात चिप्लियो भने बचाउन सकिँदैन”, स्थानीय रामकृष्ण ठकुरीले भने,” सम्बन्धित वडालाई भन्दा कुनै चासो दिएको छैन। कतिबेला कति बच्चाको ज्यान जाने हो थाहा हुन्न।” सम्बन्धित निकायले चासो नदिँदा अहिले स्थानीयहरु चिन्तित बनेका छन् । “गाई बाख्रा नचराउँ त्यत्तिकै घरकाे खाेरमा थुनेर पाल्न सकिँदैन । चराउँन पठाउँ बालबच्चा मर्लान भन्ने डर छ”,स्थानीय सरिता ठकुरीले भनिन् । स्थानीयहरुले सम्बन्धित निकायलाई पुल चाँडो निर्माण गरिदिनको लागि आग्रह गरेका छन् ।
