गृहसचिवको १५ बुँदे निर्देशन -भारतीय धर्मगुरुलाई आन्दोलनमा निषेध, पुरानो राष्ट्रिय गान गाए तत्काल पक्राउ

व्यवस्था उल्ट्याउने अभियानमा रहेका दुर्गा प्रसाईं र त्यसको काउन्टरमा एमालेको भातृ संस्था युवासंघ नेपालले काठमाडौँमा एकैदिन शक्ति प्रदर्शन गर्न लागेपछि सम्भावित सुरक्षा जोखिमलाई मध्यनजर गर्दै सरकारले कडा सुरक्षा रणनीति अपनाउने भएको छ । हिजो बसेको काठमाडौँ उपत्यका सुरक्षा समितिको बैठकले आन्दोलन लक्षित सुरक्षा रणनीति बनाउने निर्णय गरेको हो ।

साविक तोकिएको निषेधित क्षेत्र राष्ट्रपति भवन शीतल निवास, प्रधानमन्त्री निवास बालुवाटार, बानेश्वरस्थित संसद भवन, सिंहदरबार वरपर, उपराष्ट्रपति भवन लैनचौर बाहेक माइतीघर मण्डलालाई पनि प्रदर्शनकारीका लागि निषेध गर्ने बैठकको निर्णय छ ।

बैठकलाई सम्बोधन गर्दै गृहसचिव दिनेश भट्टराईले १५ बुँदे निर्देशन पनि दिएका छन् । जसमा माइतीघर मण्डलालाई निषेधित क्षेत्र निर्धारण गर्नेदेखि भारतीय धर्मगुरुहरुलाई आन्दोलनमा सहभागी हुन नदिनेलगायत छन् । त्यस्तै, प्रसाई र युवा संघको अलग-अलग ठाउँमा सभास्थल तोक्न सुरक्षा निकायका प्रमुख हरुलाई निर्देशन दिईएको छ । जसमा तीनकुने चौर, सिफल चौर, खुलामञ्च र बालाजुको भित्री बाटोलाई सभास्थल बनाउन भनिएको छ ।

गृहसचिव भट्टराईले आन्दोलनमा सहभागी हुन विभिन्न जिल्लाबाट आउने व्यक्ति तथा सवारी साधनहरुको संख्या जिल्लागत रुपमा माग्न पनि सुरक्षा निकायका प्रमुखहरुलाई निर्देशन दिएका छन् । धर्मशाला र विद्यालयलाई प्रदर्शनकारीहरुको बासस्थानको रुपमा प्रयोग गर्न नदिने, सामाजिक सञ्जालको कडाईपूर्वक नियमन गर्ने, संयुक्त सुरक्षा योजना बनाउने, श्रीपेचसहितको टि-सर्ट र पुरानो राष्ट्रिय गानको प्रयोगमा पूर्णत निषेध गर्न पनि निर्देशन दिइएको छ ।

त्यस्तै, प्रदर्शनका क्रममा सर्वसाधारणको आवतजावत व्यवस्थित बनाउन सभास्थल प्रवेशका लागि अग्रिम रुटहरु निर्धारण गरिदिने, घरेलु हात-हतियार, विष्फोटक पदार्थ प्रयोग हुनसक्ने भएकोले उपत्यका भित्रिने नाकाहरुमा चेक जाँच, डिउटी पट्रोलिङ्ग बढाउने, सुरक्षाकर्मीले कमाण्ड पोष्ट स्थापना गर्ने, न्यूनतम बल प्रयोगको सिद्धान्तअनुरुप काम कारवाही अघि बढाउने पनि सरकारको निर्णय छ ।

ईमरन्जेसी सेवाहरु अस्पताल, दमकल, एम्बुलेन्स तयारी अवस्थामा राख्ने र मसाल जुलुसहरु निकाल्न नदिन पनि गृह सचिव भट्टराईले कडा निर्देशन दिएका छन् । बैठकले उपत्यकाको सुरक्षा अवस्थाको विश्लेषणात्मत समीक्षा गर्दै हालसम्मको शान्ति सुरक्षाको अवस्था सन्तोषजनक रहेको निष्कर्ष पनि निकालेको छ ।

दिउँसो मन्त्रालयमा बसेको सुरक्षा सम्बन्धी बैठकमा काठमाडौंका सिडिओ जितेन्द्र बस्नेत, भक्तपुरका रोशनीकुमारी श्रेष्ठ र ललितपुरका रुद्रप्रसाद पण्डित सहभागी थिए । त्यस्तै, काठमाडौँ प्रहरी परिषदका एसएसपी भुपेन्द्र खत्री, सशस्त्र प्रहरी ललितपुरका एसपी सुमनजंग थापा, कीर्तिपुरका एसपी उद्धव रावल र भक्तपुरका एसपी दिनेश महतको पनि बैठकमा उपस्थिति थियो ।

गृहसचिव भट्टराईको अध्यक्षता बसेको बैठकमा मन्त्रालयका प्रवक्ता नारायणप्रसाद भट्टराई पनि सामेल थिए ।

एमालेका पूर्वकेन्द्रीय सदस्यसमेत रहेका विवादास्पद मेडिकल व्यवसायी प्रसाईंले आगामी बिहीबार शक्ति प्रदर्शन गर्ने तयारी गरेका छन् । पूर्वराजा ज्ञानेन्द्र शाहलाई गद्दीमा फर्काउने भनिए पनि बैंक तथा वित्तीय संस्थाको ऋण मिनाहा गराउने प्रसाईंको अभियान रहेको बताइन्छ । पछिल्लो समय नेकपा एमालेका अध्यक्ष केपी शर्मा ओली र नेता महेश बस्नेतसँग टक्कर गरिरहेका उनले पाँच लाख जनता काठमाडौँमा उतारेर सिंहदरबार घेर्ने दाबी गरेका छन् ।

यता, प्रसाईंलाई चुनौती दिन एमालेले पनि त्यहि दिन ५० हजार युवा–विद्यार्थी काठमाडौँका सडकमा ओराल्ने घोषणा गरेको छ । आपसमा टकराएका यी दुई समूह एकैदिन सडकमा उत्रिन लागेपछि उपत्यकाको सुरक्षा संवेदनशीलतालाई लिएर सर्वत्र चासो र चिन्ता बढिरहेका बेला सुरक्षा समितिको बैठकले यस्तो निर्णय गरेको हो ।

• संसद विघटन