महाराष्ट्रको छत्रपति संभाजी नगरमा रहेको एक कारखानामा भीषण आगलागी भएको छ । सो आगलागीमा परी ६ जनाको मृत्यु भएको छ ।
छत्रपति संभाजीनगरमा रहेको पञ्जा बनाउने कारखानामा आइतबार बिहान भीषण आगलागी भएको अधिकारीहरुले बताएका छन् । यस दुर्घटनामा कम्तीमा छ जनाको मृत्यु भएको प्रहरीले जनाएको छ । वालुज एमआईडीसी क्षेत्रमा रहेको कारखानामा करिब २ः१५ बजे देखि आगलागी सुरु भएको दमकल विभागले जनाएको छ ।
यसअघि भवनभित्र कम्तीमा ५ जना कर्मचारी फसेको स्थानीयले दाबी गरेका थिए । तर, दमकल विभागका अधिकारीहरूले पछि आगलागीमा ६ जनाको मृत्यु भएको पुष्टि गरेका छन् ।
आगलागी हुँदा कारखाना बन्द रहेको र केही कामदार भित्र सुतिरहेको मजदुरले बताए । ‘आगो लाग्दा १०–१५ कर्मचारी भवन भित्र सुतिरहेका थिए। केही भाग्न सफल भए तर कम्तिमा पाँच जना भित्र फस्न पुगे,’ एक कर्मचारीले भने ।
यसैबीच आगो निभाउने काम भइरहेको र आगलागीको यकिन कारण भने खुल्न सकेको छैन ।
