काठमाडौँ — भारतको झारखण्ड राज्यमा झारखण्ड मुक्ति मोर्चाका उपाध्यक्ष चम्पाई सोरेनले मुख्यमन्त्रीको शपथ ग्रहण गरेका छन् । राज्यपालका सीपी राधाकृष्णननले शुक्रबार राजभवनमा उनलाई पद तथा गोपनीयताको शपथ दिलाएका हुन्।
जमिन खरिदबिक्रीमा भ्रष्टाचार गरेको आरोपमा पक्राउ परेका हेमन्त सोरेनले मुख्यमन्त्रीबाट राजीनामा दिएपछि सत्ता गठबन्धनले चम्पाईलाई नयाँ मुख्यमन्त्रीका रूपमा अघि सारेको हो । शुक्रबार चम्पाईसँगै कांग्रेस नेता आलमगिर आलम र राष्ट्रिय जनता दलका सत्यानन्द भोक्ताले पनि मन्त्रिपरिषद् सदस्यको शपथ लिएका छन् ।
कांग्रेसको समर्थनमा मोर्चाले बुधबार नै बहुमत सदस्य ४३ जनाको समर्थन राज्यपाललाई पेस गरेको थियो। बहुमत सांसदहरू राज्यपाल कार्यालय अगाडि राति अबेरसम्म जम्मा भएका थिए । राज्यपालले संवैधानिक विज्ञहरूसँग छलफल गर्ने बताउँदै आएका थिए । भाजपाले सत्ता गठबन्धनसँग बहुमत नभएको दाबी गर्दै आएको थियो । भाजपाले सत्ता गठबन्धनका दल फुटाउन सक्ने आशंकामा ३९ सांसदलाई बिहीबार हैदराबाद पठाइएको थियो ।