दशगजा क्षेत्रमा भारतीय सुरक्षाकर्मीद्वारा पक्की संरचना

विराटनगर । पूर्वी सीमा इलामको पशुपतिनगरको दशगजा क्षेत्रमा पर्ने गरी भारतीय सीमा सुरक्षा बल (एसएसबी) ले पक्की संरचना बनाउन थालेपछि स्थानीय तहले चासो दिएको छ ।

‘टुरिजम गेस्ट हाउस’ बनाउने भन्दै एसएसबीले नेपाल–भारत सीमा क्षेत्रको दशगजामा निर्माणको काम सुरु गरेपछि सूर्योदय नगरपालिकाले चासो दिएको हो ।

पूर्वी नाका पशुपतिनगरमा आज यसबारे सरोकारवालासँग छलफल गर्ने तयारी गरिएको छ ।

सूर्योदय नगरपालिका २ का वडाध्यक्ष डिगबहादुर बमजनका अनुसार पुलखोलाको दशगजा क्षेत्रमा एसएसबीले गेस्ट हाउस बनाउन सुरु गरेको पाइएको छ ।

त्यस क्षेत्रको वडाध्यक्ष बमजनलगायत स्थानीय जनप्रतिनिधि र अन्य निकायका प्रतिनिधिले अवलोकन समेत गरेका थिए ।

वडाध्यक्ष बम्जन, वडासदस्य उपेन्द्रराज पान्डे, पशुपतिनगर सीमा प्रशासन कार्यालयका प्रमुख र पशुपतिनगरस्थित सशस्त्र प्रहरीको बोर्डर अब्जर्भेसन पोस्ट (बिओपी) का डिएसपीसहितको टोलीले हिजो साँझ त्यस क्षेत्रको अवलोकन गरेको थियो ।

त्यस क्रममा तत्काललाई संरचना बनाउन रोकेर दुवै पक्षको छलफलपछि मात्र अघि बढ्न एसएसबीलाई आग्रह गरिए पनि बेवास्ता गरिएको बमजनले बताए ।

आज हुने छलफलपछि विस्तृत बुझेर प्रशासन कार्यालय लगायत निकायमा यसबारे जानकारी दिने तयारी भइरहेको स्थानीय जनप्रतिनिधिले बताएका छन् ।

पूर्वी सीमामा यसअघि पनि पटक पटक सीमासम्बन्धी विवाद हुँदै आएको छ । भारतीय सुरक्षाकर्मीले कहिले वन डिभिजन कार्यालयको भवन भन्दै अनि कहिले क्याम्प राख्ने भन्दै संरचना बनाउने गरेका छन् ।

नेपाली जनप्रतिनिधि, प्रशासन र सरोकारवालाले त्यस्ता कामको विरोध गर्दै आवाज उठाउने गरेका छन् । त्यही कारण दशगजा क्षेत्र र सीमा मिचेर बनाइएका संरचनाहरु हटाइँदै आएको छ ।

• संसद विघटन