‘दयारानी’ हिट भएको सार्वजनिक गर्दै दयाहाङले भने, ‘हामी सम्पूर्णप्रति आभार व्यक्त गर्दछौ’
साझा परिवेश
बुधबार, फाल्गुन ९, २०८० १४:२७
काठमाडौँ । अभिनेता दयाहाङ राईले फिल्म ‘दयारानी’ हेरिदिएकोमा सबै प्रति आभार व्यक्त गरेका छन् । उनले सामाजिक सञ्जाल फेसबुकमा फिल्मको एक पोस्टर शेयर गर्दै उक्त आभार व्यक्त गरेका हुन् ।
सार्वजनिक पोस्टरमा फिल्मको कलेक्सन २ करोड ५० लाख उल्लेख गर्दै हिट भएको दाबी समेत गरिएको छ । तर फिल्मको कलेक्सनलाई पुष्टि गर्ने आधार भने छैन । किनभने चलचित्र विकास बोर्डले केही महिनादेखि बक्स अफिस तथ्याङ्क बिग्रिएको दाबी गर्दै आएको छ ।
फिल्म माओत्से गुरुङले निर्देशन गरेका हुन् । देशकै सबैभन्दा ठुलो मल्टीप्लेक्स चेन क्यूएफएक्सले बुधबारका लागि देशभर २८ शोज उपलब्ध गराएको छ, जुन उत्साहप्रद हो । यसले पनि फिल्मको व्यापार राम्रो रहेको देखाउँछ ।
‘दयारानी’मा दयाहाङ राईको जोडी अभिनेत्री दीया पुन बनेकी छन् । फिल्ममा दयाहाङ र दीयाको अलावा विजय बराल, नयन गुरुङ, शिरिषा कुँवर, पुष्कर गुरुङ, प्रमिश गुरुङ लगायतको अभिनय छ । फिल्मले निःसन्तान दम्पतीको कथा उठाएको छ ।
