गृहमन्त्रीलाई ज्ञानेन्द्रको सुझाव- विदेशी राजाका खुट्टा ढोक्न जानुभन्दा आफ्नै राजा फर्काउन लाग्नुस्
साझा परिवेश
मङ्लबार, बैशाख ११, २०८१ ११:४0
राष्ट्रिय प्रजातन्त्र पार्टी (राप्रपा) का सांसद ज्ञानेन्द्र शाहीले कतारका राजा आउँदा सार्वजनिक बिदा दिएकाे भन्दै गृहमन्त्री रवि लामिछानेसँग आक्राेश पाेखेका छन्।
उनले मंगलबार सामाजिक सञ्जालमा गृहमन्त्री लामिछानेकाे टिप्पणी गर्दै विदेशी राजाका खुट्टा नै ढोक्न जानुभन्दा आफ्नै देशका राजा फर्काउने अभियानमा लाग्न सुझाव दिएका छन्।
सांसद शाहीले लामिछाने र अरु नेतामा फरक नभएकाे समेत टिप्पणी गरेका छन्।
उनले भनेका छन्, ‘माननीय रवि लामिछानेज्यु, हिजोका दिनहरुमा तपाईंले जनताको आवाज उठाउँदै गर्दा हाम्रो साथ र समर्थन थियो तर आज तपाईं आफैँ गृहमन्त्री हुँदा कतारका राजा आउँदा सार्वजनिक बिदा दिनुभएछ, अब भन्नुहोस्, तपाईं र अरु नेतामा के फरक भो? बोल्ने एउटा गर्ने एउटा? विदेशी राजाका खुट्टा नै ढोक्न जानुभन्दा आफ्नै देशका राजा फर्काउने अभियानमा लाग्नुहोस कति गुलामी गर्छौ हो विदेशीको?’
