संसद बैठक चार बजेलाई सर्यो ; राष्ट्रियसभा बैठक पनि सारियो
साझा परिवेश
बिहिबार, जेष्ठ ३, २०८१ १३:४१
काठमाडौं । प्रतिनिधि सभाको बैठक अपराह्न चार बजेका लागि सारिएको छ । आजको बैठक बिहान ११ बजे बस्ने तय भएको थियो ।
तर प्रमुख प्रतिपक्षी नेपाली कांग्रेससँग सहमतिको प्रयास भइरहेकाले प्रतिनिधि सभाको बैठक अपराह्न चार बजेका लागि सारिएको संसद सचिवालयले जनाएको छ ।
सहकारी संस्थाको रकम अपचलनमा मुछिएका उपप्रधान तथा गृहमन्त्री रवि लामिछानेमाथि छानबिनका लागि संसदीय समिति गठन गर्नुपर्ने माग नेपाली कांग्रेसले राख्दै आएको छ । कांग्रेसको यही अडानका कारण संसदको गतिरोध अन्त्य हुन सकेको छैन । संघीय संसदमा नीति तथा कार्यक्रम प्रस्तुत गरेका राष्ट्रपतिलाई धन्यवाद ज्ञापन गर्ने प्रस्ताव समेत कांग्रेसको अवरोधका कारण पारित हुन सकेको थिएन ।
राष्ट्रियसभा बैठक पनि सारियो
राष्ट्रियसभाको बैठक पनि सारिएको छ। दिउँसो १ः१५ बजे बस्ने तय भएको बैठक ४ः३० मा बस्नेगरी सारिएको संसद सचिवालयका महासचिव पद्मप्रसाद पाण्डेयले बताएका छन्।
राष्ट्रियसभा नियमावली, २०७५ को नियम ६ उपनियम ९३० बमोजिम राष्ट्रियसभा अध्यक्षले बैठक सारेको सूचनामा उल्लेख छ। सहकारी ठगी प्रकरणमा जोडिएका गृहमन्त्री रवि लामिछानेमाथि छानविन गर्नको लागि संसदीय समितिको माग गर्दै कांग्रेसले मंगलबारको बैठकमा अवरोध गरेको थियो।
त्यही बिषयमा कुरा नमिल्दा प्रनिनिधि सभाको बैठक पनि सारिएको छ। प्रधानमन्त्रीसहित दलका शीर्ष नेताहरु अहिले सदनको गतिरोध हटाउन छलफलमा जुटेका छन्।
