काठमाडौँ – बङ्गलादेशको अन्तरिम सरकारले आज शपथ लिने भएको छ ।
बङ्गलादेशको सेनाका प्रमुख वाकर उज जमानले डा, मोहमद युनुस नेतृत्वको अन्तरिम सरकारले आज शपथ लिने जानकारी दिएका हुन् । सेना प्रमुख जमानले अन्तरिम सरकार १५ सदस्यीय हुने बताएका छन् ।
साथै उनले बङ्गलादेशमा ३-४ दिन भित्र पूर्ण रूपमा शान्ति बहाल हुने बताएका छन् । उनले देशमा पछिल्ला दिनहरूमा लुटपाट र तोडफोडका घटनाहरूमा संलग्न सबैलाई कानुनको दायरामा ल्याउने बताउँदै देशमा शान्ति बहाल गर्न एयर फोर्स र नाभीले मिले काम गरिरहेको समेत जानकारी दिए ।
उनले अन्तरिम सरकार प्रमुखमा नियुक्त भएका युनुससँग आफूले कुरा गरेको र उनको नेतृत्वमा देश छिट्टै प्रजातान्त्रिक प्रक्रियामा फर्किने विश्वास व्यक्त गरेका छन् ।
गत सोमबार शेख हसिनाले प्रधानमन्त्रीबाट राजीनामा दिएर देश छोडेपछि अनिश्चित बनेको बङ्गलादेशको राजनीति अब बिस्तारै ट्र्याकमा आउने देखिएको छ । आन्दोलनरत विद्यार्थीहरूको माग बमोजिम राष्ट्रपति मुहमद शाह्बुद्दीनले संसदको भङ्ग गरेर नोबेल पुरस्कार विजेता डा. युनुसको नेतृत्वमा अन्तरिम सरकार गठन गरेका थिए ।
