काँग्रेस–एमाले गठबन्धन सरकारले नेपाल विद्युत प्राधिकरणका कार्यकारी निर्देशक कुलमान घिसिङलाई सोमबार रातीनै पदबाट हटायो । केपी ओली नेतृत्वको गठबन्धन सरकार बनेदेखि नै जसरी भएपनि कुलमानलाई हटाउने तयारीमा थियो सरकार । अन्ततः सोमबार राति बसेको मन्त्रिपरिषद बैठकले कुलमानको कार्यकाल ५ महिना जति बाँकी रहँदै पदबाट हटाएरै छोड्यो । उनलाई हटाएसँगै प्रधानमन्त्री ओली र ऊर्जामन्त्री दीपक खड्काको धोको पूरा भएको छ । कुलमानलाई हटाउने बित्तिकै सरकारले सोमबार नै प्राधिकरणको कार्यकारी निर्देशकमा हितेन्द्रदेव शाक्य नियुक्त गरेको छ । तर सरकारको यो निर्णय सरकार आफैलाई भारी परेको छ ।
सरकारले कुलमान घिसिङलाई हटाएर हितेन्द्रदेव शाक्यलाई नियुक्त गरेपछि चौतर्फी विरोध सुरु भएको छ ।
नेपाली कांग्रेसका नेता शेखर कोइराला, महामन्त्रीद्वय गगन थापा, विश्वप्रकाश शर्मा, अर्जुननरसिंह केसी, डिला संग्रौला लगायतले आफ्ना सामाजिक संजालमा लेखेर कडा विरोध जनाएका छन् । यस्तै, माओवादी केन्द्रका अध्यक्ष पुष्पकमल दाहाल प्रचण्ड, पूर्वप्रधानमन्त्री बाबुराम भट्टराई लगायतले सरकारको विरोध गर्दै नालायकको संज्ञा दिएका छन् । उता सोमबार राति नै फेसबुक लाइभमा आएर राष्ट्रिय स्वतन्त्र पार्टी (रास्वपा) का सभापति रवि लामिछानेले पनि साङ्केतिक विरोध गरेका छन् । लाइभमा आएर उनले केही बोलेनन् । बरु उनले साङ्केतिक विरोधस्वरुप बत्ती निभाएर मैनबत्ती बालेका छन् । त्यस्तै कलाकारहरु मनोज गजुरेल, केदार घिमिरे, लेखक अनुप भट्टराई लगायतले सरकारको निर्णयको विरोध जनाएका छन् ।
