काठमाडौंको तीन कुनेमा १५ चैत्रमा राजावादीहरुको हिंसात्मक प्रदर्शनमा क्रममा जिउँदै जलाएर हत्या गरिएका पत्रकार सुरेश रजकको परिवारसँग आज प्रधानमन्त्री केपी शर्मा ओलीले बालुवाटारमा भेट गरेका छन् । भेटमा प्रधानमन्त्री ओलीले मृतक सुरेशकी श्रीमती सुजन रजकलाई रोजगारीको व्यवस्था गरिने प्रतिबद्धता जनाउदै सुरेशको दाहसंस्कार गर्न आग्रह गरेका छन् । प्रधानमन्त्री निवास, बालुवाटारमा भएको भेटमा प्रधानमन्त्री ओलीले अराजक जत्थाको आगलागीका कारण अकालमा ज्यान गुमाउन पुगेका पत्रकार रजकप्रति श्रद्धाञ्जली व्यक्त गर्दै परिवारमा समवेदना व्यक्त गरे । प्रधानमन्त्री ओलीले उक्त दुःखद् घटनाको छानबिन गरी दोषीमाथि कडा कारवाही गरिने प्रक्रिया सुरु भएको बताए । प्रधानमन्त्री ओलीले मृतकको दाहसंस्कार गर्न परिवारजनलाई आग्रह गर्दै सुरेशकी श्रीमती सुजन रजकलाई रोजगारीलगायत आवश्यक पर्ने अन्य व्यवस्थाका लागि सरकारले ध्यान दिने बताए ।
