संयुक्त राज्य अमेरिकाले अवैध रूपमा बसोबास गरिरहेका आप्रवासीहरूलाई प्रोत्साहन दिने घोषणा गरेको छ ।
यदि उनिहरु स्वेच्छाले देश छोड्न चाहेमा उल्टै उपाहार स्वरूप १००० डलर दिने भएको छ ।
यस कार्यक्रमअन्तर्गत, स्वेच्छाले अमेरिका छोड्ने आप्रवासीहरूलाई १,००० अमेरिकी डलरको प्रोत्साहन राशिसहित यात्रा खर्च पनि सरकारले व्यहोर्ने जानकारी गराएको छ । यो कार्यक्रम “सिबिपी होम” नामक मोबाइल एपमार्फत सञ्चालन गरिनेछ, जसले आप्रवासीहरूलाई आफ्नो देश फर्कने प्रक्रिया व्यवस्थापन गर्न सहयोग पुर्याउनेछ ।
यस कार्यक्रमको उद्देश्य जबर्जस्ती निष्कासन प्रक्रियाको सट्टा कम खर्चिलो र प्रभावकारी विकल्प प्रदान गर्नु हो। औसत रूपमा, एक व्यक्तिलाई जबर्जस्ती निष्कासन गर्दा १७,००० डलर खर्च हुने हुँदा, स्वेच्छिक प्रस्थान कार्यक्रमले सरकारको खर्च घटाउने अपेक्षा गरिएको छ ।
तर, आप्रवासी अधिकारकर्मीहरूले यस कार्यक्रमप्रति चिन्ता व्यक्त गरेका छन्। उनीहरूको अनुसार, स्वेच्छिक प्रस्थान गरेपछि पनि केही आप्रवासीहरूलाई १० वर्षसम्म पुनः अमेरिका प्रवेशमा रोक लाग्न सक्छ, विशेष गरी जो एक वर्षभन्दा बढी समय अवैध रूपमा अमेरिका बसेका छन् । साथै, भविष्यमा कानुनी रूपमा पुनः प्रवेशको कुनै निश्चित मार्गदर्शन नभएकोले, यस कार्यक्रमले भ्रम सिर्जना गर्न सक्ने चेतावनी दिइएको छ ।
