वीरगन्ज । पर्सामा सडकमा गुडिरहेको स्कर्पियोले ठक्कर दिँदा एक १३ वर्षीय बालकको निधन भएको छ ।
आज बिहान ८:३० बजे ठोरी गाउँपालिका-४ विजयवस्ती स्थित हुलाकी सडक खण्डमा ठोरीबाट वीरगन्ज तर्फ आउँदै गरेको बाग्मती प्रदेश -०१-०२७ च ०३०३ नम्बरको स्कर्पियोले एक बालकलाई ठक्कर दिएको थियो ।
दुर्घटनामा कोचिङ पढेर फर्कँदै गरेका ठोरी गाउँपालिका-४ विजयवस्ती बस्ने वर्ष १३ को विश्वास श्रेष्ठ गम्भीर घाइते भएका थिए ।
घाइते श्रेष्ठको तराइ अस्पताल वीरगन्जमा ल्याई उपचार हुँदाहुँदै १०:१५ बजे चिकित्सकले मृत घोषित गरेका हुन् ।
दुर्घटना भएपछि फरार रहेको स्कर्पियो र चालकलाई प्रहरी चौकी सिर्सियाबाट खटिएको प्रहरी टोलीले नियन्त्रणमा लिएको छ ।
प्रहरीले चालक चितवनको माडी ३ बस्ने वर्ष २५ को पदम बिलास पन्त र दुर्घटना गराउने स्कर्पियोलाई नियन्त्रणमा लिएको पर्सा प्रहरी प्रवक्ता डिएसपी दिपक गिरी बताए ।
