काठमाडौं । ‘छक्कापञ्जा ४’को दबदबा कायमै रहँदा शुक्रबारदेखि नेपाली हलमा हलिउडको ‘जोन वीक : च्याप्टर ४’ र जापानी फिल्म ‘डेमन स्लेयर : किमेत्सु नो याइबा–सोडस्मिथ भिलेज’ रिलिज भएका छन् । यी दुवै विदेशी फिल्म विश्व बजारका प्रतीक्षित फिल्महरु हुन् ।
केनु रिभ्स स्टारर ‘जोन वीक : च्याप्टर ४’ चाड स्टेहेल्स्कीद्वारा निर्देशित नोयर–एक्सन–थ्रिलर फिल्म हो । यो फिल्म सन् २०१९ मा रिलिज भएको ‘प्याराबेलम’को श्रृंखला र जोन वीक सिरिजको चौैथो अध्याय हो । शीर्ष भूमिकामा अभिनेता रिभ्सको भूमिका छ भने डोनी येन, बिल स्कार्सगार्ड, लरेन्स फिसबर्नका महत्वपूर्ण भूमिकामा छन् ।
शीर्ष पात्रले स्वतन्त्रता प्राप्तिका लागि विश्वभर छरिएर रहेको दुश्मनको गठबन्धनसँग गर्नुपर्ने लडाइ यसको केन्द्रीय कथावस्तु हो । जोन वीक सिरिजका नियमित दर्शक र केनु रिभ्सका प्रशंसकलाई यो फिल्म रुचिकर हुन सक्छ । हलिउड समीक्षकले यो फिल्मलाई जोन वीक सिरिजकै उत्कृष्ट फिल्म भएको बताएका छन् । तपाईंलाई एक्सन फिल्ममा रुचि छ भने यो दर्शनीय हुन सक्छ ।
‘डेमन स्लेयर’ जापानी एनिमे फिल्म हो जुन त्यहाँको सोहेन मांगा भनिने कमिक सिरिजको कथावस्तुमा आधारित छ । यो फिल्म एनिमे टेलिभिजन श्रृंखलाको दोस्रो सिजन तथा सन् २०२० मा रिलिज भएको ‘किमेत्सु नो याइबा’को दोस्रो शृंखला हो । हारुओ सोतोजाकीद्वारा निर्देशित फिल्मले अहिलेसम्म विश्व बक्स अफिसमा ४८.२ मिलियन डलर कमाएको छ ।
उक्त फिल्ममा माथिल्लो तहका ६ वटा राक्षसको पराजयपछि उनीहरु इन्फिनिटी क्यासलमा भेला हुन्छन् र पुनः जितको लागि संघर्ष गर्छन् । एनिमे सिरिजका नियमित दर्शकलाई यो फिल्म रुचिकर हुन सक्छ । यो फिल्मको लम्बाइ १ घण्टा ५० मिनेट छ । नेपालमा अहिले पनि ‘छक्कापञ्जा ४’, ‘तु झूठी मैं मक्कर’, मिसेस चटर्जी भर्सेस नर्वे र साजम ः फ्युरी अफ द गड्स प्रदर्शन भइरहेका छन् ।
