गोविन्दा बलिउडका चर्चित कलाकार हुन्। उनले एक समयमा बलिउड फिल्म उद्योगमा उत्कृष्ट फिल्म दिएका छन्। उनी आफ्नो समयका सुपरहिट स्टार थिए।
अभिनेताले चलचित्रमा काम गर्दा धेरै पैसा कमाए, जसको बारेमा उनका भाइले एउटा रमाइलो किस्सा सुनाएका छन्।
गोविन्दा सय अटो किन्न चाहन्थे
हालै गोविन्दाका भाइ कीर्तिले विनय पाठकको शो ‘हर घर कुछ कहता है’मा एउटा हास्यास्पद किस्सा सुनाए। उनले कार्यक्रममा भनेका थिए, ‘जब गोविन्दा ठूला अभिनेता बने, मैले उनको सेक्रेटरीको रूपमा काम गरेँ। मैले उनलाई आवश्यकताभन्दा धेरै फिल्म साइन गराउन लगाएको थिएँ।’
कीर्तिका अनुसार एक दिन गोविन्दाले कोठा बन्द गरेर सबै पैसा देखाए र बैंकको विवरण पनि देखाए। गोविन्दाले पैसाको के गर्ने भनेर सोचिरहेका थिए। त्यसपछि गोविन्दालाई १०० अटो रिक्सा किन्ने विचार आयो।
त्यसको केही समयपछि पुन: गाेविन्दले सय ट्रक किनौँ भनेर कीर्तिलाई प्रस्ताव राखेका थिए। कीर्तिले उक्त बखत पनि अटोरिक्सा अथवा ट्रक किनेर केही काम नलाग्ने बताएका थिए।
एकैपटक ७० वटा फिल्ममा साइन
गोविन्दाले केही समयअघि आफ्नो पहिलो डेब्यु फिल्मपछि ७० भन्दा बढी फिल्म साइन गरेको बताएका थिए। तर सेड्युल निकै टाइट भएकाले अन्य फिल्मका लागि समय नपाएपछि उनले केही चलचित्र छाड्नुपरेको थियो।
सन् १९८६ मा रिलिज भएको फिल्म इल्जामबाट गोविन्दाले बलिउडमा डेब्यू गरेका थिए। उनले १६५ भन्दा बढी फिल्ममा काम गरिसकेका छन्।
गाेविन्दा लाेकसभाका पूर्वसदस्यसमेत हुन्। उनी २००४ मा भारतीय राष्ट्रिय कंग्रेसमा आवद्ध भएका थिए।
