काठमाडौं । देशका केही पहाडी भूभागमा आज वर्षा हुने सम्भावना छ । मौसम पूर्वानुमान महाशाखाका अनुसार मेघगर्जनसहित क्षणिक वर्षा हुनेछ । काठमाडौंमा अहिले छिटपुट वर्षा हुन थालेको छ । महाशाखाका मौसमविद् सन्जीव अधिकारीका अनुसार क्षणिक वर्षा हुनेछ ।
“एकदमै क्षणिक वर्षा हुन्छ । काठमाडौंसहित आसपास, नुवाकोट, रसुवा, कोसी प्रदेश र गण्डकी प्रदेशका पहाडी भूभागमा वर्षा हुने सम्भावना छ,” उनले बाह्रखरीसित भने, “आज बिहान पनि मकवानपुरमा वर्षा भएको थियो ।” देशमा पश्चिमी र स्थानीय वायुको प्रभाव रहेको र त्यसैले वर्षा गराएको उनले बताए ।
महाशाखाका अनुसार बंगालको खाडीमा विकसित ‘मोखा’ हाल अति शक्तिशाली चक्रवातमा परिणत भएको छ । उक्त चक्रवात उत्तर–पूर्व दिशातर्फ उन्मुख हुँदै बंगलादेश तथा म्यानमारको तटीय क्षेत्रमा बढिरहेको छ । त्यसले नेपालमा खासै असर नगर्ने मौसमविद् अधिकारीको भनाइ छ । “पश्चिमी वायु र स्थानीय वायुको प्रभावले नै वर्षा गराउने हो,” उनले भने, “मोखाले धेरै पानी गराउने अवस्था छैन ।
बंगलाको खाडीबाट जलवाष्पयुक्त वायु भित्रिने र त्यसले यहाँको प्रणाली थप मजबुत बनाउने उनले बताए । “आजभन्दा भोलि वर्षाको सम्भावना बढी छ,” उनले भने, “बंगालको खाडीबाट जलवाष्पयुक्त वायु भित्रिँदा पश्चिमी र स्थानीय वायुलाई थप सशक्त बनाउँदा वर्षाको सम्भावना बढी देखिन्छ ।”
भोलिको तुलनामा पर्सि वर्षाको सम्भावना कम रहेको उनले बताए । उनका अनुसार पर्सि पहाडी भूभागमा भने वर्षाको थोरै सम्भावना छ ।
