अध्यक्षमाथि कुटपिट र गालीगलौज गरेको आरोपमा वडाध्यक्ष पक्राउ ।
नेकपा एमालेले वडा कार्यालयमा तालाबन्दी गरेको थियो ।
पोखरा ।।
उपभोक्ता समिति अध्यक्षमाथि कुटपिट र गालीगलौज गरेको आरोपमा माछापुच्छ्रे गाउँपालिका वडा नं. ८ का वडाध्यक्ष राम गुरुङलाई प्रहरीले पक्राउ गरेको छ ।
वडाध्यक्ष गुरुङ बुधबार साँझ आफैं प्रहरीमा उपस्थित भएको जिल्ला प्रहरी कार्यालय कास्कीका प्रवक्ता डीएसपी श्रवणकुमार बिकले जानकारी दिए ।
‘उहाँ हिजो आफैं प्रहरी कार्यालयमा उपस्थित हुनुभयो । अहिले हाम्रो नियन्त्रणमा हुनुहुन्छ,’ डीएसपी विकले भने, ‘उहाँमाथि कानुनबमोजिम अनुसन्धान प्रक्रिया अगाडि बढाइएको छ ।
’ माछापुच्छ्र्रे गाउँपालिका-८ का वडाध्यक्ष राम गुरुङले आइतबार आफूलाई कुटपिट गरेको खोराको मुख-उपल्लो इदिखोला माछापुच्छ्रे सडक निर्माण उपभोक्ता समितिका अध्यक्ष अमृत भण्डारीले बताएका थिए ।
भण्डारीमाथि हातपात भएपछि मंगलरदेखि नेकपा एमालेले वडा कार्यालयमा तालाबन्दी गरेको थियो । बुधबार जाहेरी दर्ता गर्ने सहमतिपछि एमालेले तालबन्दी खोलेको छ ।
उक्त बाटो स्तरोन्नति गर्न पूर्वाधार विकास कार्यक्रमअन्तर्गत २१ लाख ५४ हजार रुपैयाँ बजेट परेको थियो । माछापुच्छ्रे गाउँपालिका वडा नं. ७ र ८ जोड्ने उक्त सडक स्तरोन्नति गर्न वडा नं. ७ का अमृत भण्डारी गत चैत १४ गते अध्यक्ष चुनिएका थिए ।
