पशुमा देखापरेको लम्पी स्किन रोग सुनसरीमा दिनदिनै तीब्र रुपामा बढ्दै गएको छ । जिल्लाको दक्षिणी क्षेत्र हरिनगर गाँउपालिका , बर्जु, देवाङगञ्ज, कोशी, भोक्राहा नरसिंह, गढि गाँउंपालिका र इनरुवा नगरपालिकामा लम्पी स्किन रोगको प्रकोप बढ्दै गएको छ । गाईवस्तुको छालामा गिर्खा आउने र छाला कुहिएर झर्ने जस्ता समस्या देखापरेको छ ।
सुनसरी जिल्लामा लगभग २२ हजारको हाराहारीमा गाईवस्तुमा संक्रमण फैलिएको र करिब ४ सय ५० गाईवस्तु मरेको भेटेरिनरी अस्पताल तथा पशु सेवा विज्ञ केन्द्र सुनसरीको कार्यलय प्रमुख पशु चिकित्सक कुमार सिंह खत्रीले बताउनुभयो ।
सुनसरीमा लम्पी स्किन रोगको उपचार तथा नियन्त्रणका लागि सवै पालिकाको प्रमुख, उपप्रमुखहरुको बैठक बसि रोगबारे छलफल गरिएको छ । जिल्ला कार्यालय सुनसरीको सभहलमा बैठक बसि हरेक पालिकाहरुले रोग लाग्नबाट बचाउने र रोग लागेका गाईवस्तुलाई समयमै उपचार गर्ने निर्णय गरिएको छ ।
भेटेरिनरी अस्पताल तथा पशु सेवा विज्ञ केन्द्र सुनसरीको सहकार्यले लम्पी स्किन रोगको भ्याक्सिन करिब ७ हजार ४ सय पचाँस भ्याक्सिन पालिकाहरुमा पठाएको पशु चिकित्सक खत्रीले बताउनुभयो ।अहिलेसम्म लम्पी स्किन रोगविरुद्धको खोप सुनसरीमा करिब ६ हजार पाँचसयको हाराहारीमा रोग नलागेको ठाउँको पशुलाई लागाईसकेको र खोप लगाएपछि त्यहाँ रोग नभेटिएको पशु चिकित्सक खत्रीले बताउनु भयो ।
