भक्तपुर अस्पताल र नागरिकलगाएत विभिन्न अस्पतालमा मन्त्री बस्नेतको अनुगमन

• काठमाडौं उपत्यकाका आठवटा अस्पताल अनुगमन
• अधिकांश अस्पतालमा स्वास्थ्य संस्था सञ्चालन मापदण्ड नपुगेको
• कूल शैय्याको १० प्रतिशत शैय्यामा विपन्नलाई निःशुल्क उपचारका लागि नछुट्याइएको 
• उपत्यकाका अधिकांश अस्पताल मापदण्डअनुसार नचलेको 
• “अनुगमन टिमको रिपोर्टका आधारमा कानुनी कारबाही गर्छौँ,”  : मन्त्री बस्नेत

काठमाडौं ।।

स्वास्थ्य तथा जनसंख्यामन्त्री मोहनबहादुर बस्नेत नेतृत्वको टोलीले बिहीबार काठमाडौं उपत्यकाका आठवटा अस्पताल अनुगमन गर्‍यो । जसमध्ये अधिकांश अस्पतालमा स्वास्थ्य संस्था सञ्चालन मापदण्ड नपुगेको पाइयो ।

अनुगमनमा अतिरिक्त सचिवहरु डा. विकास देवकोटा, डा. टंक बराकोटी, डा. संगीता कौशल मिश्र र स्वास्थ्य सेवा विभागका महानिर्देशक डा. दीपेन्द्ररमण सिंहको नेतृत्वमा चारवटा टोली खटिएको थियो । जसमा प्याथोलोजिस्ट, रेडियोलोजिस्ट, नर्सिङ अधिकृत, फर्मासिस्ट, माइक्रोबायोलोजिस्ट, स्त्री तथा प्रसूतिरोग विशेषज्ञ, सरुवा रोग विशेषज्ञ, मानव संशाधन, अस्पताल व्यवस्थापकसहितका विज्ञ सहभागी थिए ।

अनुगमन गरिएकामा नेपाल मेडिकल कलेज जोरपाटी, शंकरापुर अस्पताल जोरपाटी, अल्का अस्पताल जावलाखेल, मेडीसिटी अस्पताल भैँसेपाटी, कान्ति बाल अस्पताल महाराजगञ्ज, मनमोहन सामुदायिक अस्पताल स्वयम्भू, भक्तपुर अस्पताल र नागरिक सामुदायिक अस्पताल गठ्ठाघर भक्तपुर रहेका छन् ।

अनुगमनमा संलग्न टोलीले प्रस्तुत गरेको प्रारम्भिक रिपोर्टका आधारमा अधिकांश अस्पतालहरुले मापदण्ड पालना नगरेको नपाइएको हो । सो क्रममा अस्पतालहरुले कूल शैय्याको १० प्रतिशत शैय्यामा विपन्नलाई निःशुल्क उपचारका लागि छुट्याउनुपर्नेमा त्यसो नगरेको पाइएको थियो ।

कुल शैय्याको १० प्रतिशत आकस्मिक शैय्या छुट्याउनु पर्नेमा त्यसो नगरेको, आवश्यकताभन्दा बढी शल्यक्रियामार्फत डेलिभरी गराएको, प्याथलोजी व्यवस्थित नभएको, स्टाफ नर्स तथा सहायक स्तरका कर्मचारीहरुलाई न्यूनतम तलब समेत दिने नगरिएको टोलीका संयोजक अतिरिक्त सचिव डा.टंक बाराकोटीले बताए ।

त्यस्तै, अस्पतालजन्य फोहोर व्यवस्थापनको उचित व्यवस्थापन नगरेको, अस्पतालमा उपलब्ध सेवा सार्वजनिक नगरिएकोलगायतका धेरै मापदण्डविपरीतका कार्य भएको पाइएको डा. बाराकोटीको भनाइ छ ।

मापदण्ड नपुर्‍याई सञ्चालनरत अस्पतालाहरुलाई कारबाही गरिने अनुगमनपछि मन्त्री बस्नेतले बताएका छन् । यसबारे मन्त्रालयले छिट्टै निर्णय लिने उनले प्रतिवद्धता जनाए ।

“अनुगमनको प्रारम्भिक रिपोर्टअनुसार उपत्यकाका अधिकांश अस्पताल मापदण्डअनुसार चलेको पाइएन । नियमविपरीत सञ्चालित अस्पतालहरुलाई अनुगमन टिमको रिपोर्टका आधारमा कानुनी कारबाही गर्छौँ,” मन्त्री बस्नेतले भने ।