नेम्वाङको सम्मानमा एमालेले तीन दिन पार्टीकाे झण्डा आधा झुकाउने
साझा परिवेश
मङ्लबार, भदौ २६, २०८० १२:५२
नेकपा (एमाले)ले पार्टी संविधानसभा अध्यक्ष एवम् पार्टी उपाध्यक्ष सुवास नेम्वाङको सम्मानमा तीन दिन देशभरका सबै पार्टी कार्यालयका ‘पार्टी झण्डा’ झुकाउने भएको छ।
मंगलबार बिहान हृदयघातबाट नेम्वाङको निधन भएपछि च्यासलस्थित पार्टीको मुख्यालयमा बसेको आकस्मिक सचिवालय बैठकले उक्त निर्णय गरेको नेता प्रदीप ज्ञवलीले बताए।
‘उहाँको सम्मानमा तीन दिनसम्म देशका सबै पार्टी कार्यालयहरुमा पार्टी झण्डा आधा झुकाइने छ,’ ज्ञवलीले भने, ‘पार्टीको केन्द्रीय कार्यालय, प्रदेश कार्यालय, जिल्ला कार्यालयहरु र उहाँको निर्वाचन क्षेत्रमा शोक पुस्तक राखिने छ।’
त्यस्तै एमालेले पार्टी र पार्टीसम्बद्ध सबै संगठनहरुका निर्धारित कार्यक्रमहरु स्थगित गरेको छ।
असोज २ गते पार्टी केन्द्रीय कार्यालयमा विशेष श्रदाञ्जली सभा गर्ने सचिवालय बैठकले निर्णय गरेको छ। नेम्वाङको पार्थिव शरीर श्रदाञ्जलीको लागि पार्टीका कार्यालयमा राखिएको छ।
