हुण्डी कारोबारमा पहिल्यै एउटा नोटको फोटो माग्ने नियम
त्योसँग मिल्दो नम्बर भएको नोट लिएर पुग्नेलाई मात्र भुक्तानी दिने
सुन तस्करीमा पनि हुण्डी शैली प्रयोग गरेर सुनको बिक्री वितरण गर्ने गरेको पाइयो
काठमाडौं ।।
हुण्डी कारोबारमा संलग्नहरुले भुक्तानी लिन आउनेको पहिचानका लागि पहिल्यै एउटा नोटको फोटो माग्छन् । त्योसँग मिल्दो नम्बर भएको नोट लिएर पुग्नेलाई भुक्तानी दिन्छन् ।
६० किलो सुन तस्करीमा संलग्न चिनियाँ नागरिकको गिरोहले पनि यही शैली प्रयोग गरेर सुनको बिक्री वितरण गर्ने गरेको पाइएको छ ।
केन्द्रीय अनुसन्धान ब्यूरो (सीआईबी) ले गरेको अनुसन्धानका क्रममा चिनियाँ गिरोहको नाइकेले ह्वाट्स एपमार्फत नेपाली रुपैयाँको नोट पठाउने गरेको पाइएको हो । त्यो नोट लिएर जाने व्यक्तिलाई सुन पठाउने गरेको अनुसन्धानबाट खुलेको अनुसन्धानमा संलग्न एसपी सञ्जयसिंह थापाले बताए ।
‘ह्वाट्स एपमा १० रुपैयाँको नोट पठाएको पाइएको छ, त्यो नोट लिएर जाने व्यक्तिले सुन पाउने देखिएको छ’, उनले भने, ‘नोट सुन लिन पाउने मान्छेको भेरिफिकेसनका लागि प्रयोग गर्ने गरेको देखिएको छ ।’
सुन गाल्न टोखा र लाजिम्पाटमा भएको फ्याक्ट्रीमा काम गर्ने समूहले चिनियाँ नाइके लिन र लीले पठाएको १० रुपैयाँको नोटको तस्वीर ह्वाट्स एपमार्फत पाउने गरेको देखिएको छ । र, त्यो नोट लिएर जानेलाई सुन दिने गरेको पाइएको छ । त्यसरी लिएको सुन चिनियाँ नागरिक एलेक्समार्फत टोखाका सुमन खरेल हुँदै अन्य व्यक्तिसम्म पुग्ने गरेको पाइएको देखिएको छ ।
‘खरेलबाट सुनचाँदी व्यवसायी संघ बाराका अध्यक्ष शिवकुमार सर्राफले पनि सुन किन्ने गरेको पाइएको छ, सुन लिने अर्का एक नेपाली र दुई भारतीय नागरिक फरार छन्’, अनुसन्धानमा संलग्न एक अधिकृतले भने, ‘फरारहरुको खोजी जारी रहन्छ ।’
२ साउनमा राजश्व अनुसन्धान विभागको टोलीले त्रिभुवन अन्तर्राष्ट्रिय विमानस्थल भन्सार कार्यालयबाहिर सुनसहितको १५५ किलो ब्रेक प्याड बरामद गरेको थियो । १९ दिनसम्म अनुसन्धान गरेर राजश्व अनुसन्धान विभागले यसमा संगठित अपराधको तत्व देखिएको भन्दै थप अनुसन्धानका लागि फाइल सीआईबीलाई बुझाएको थियो ।
त्यसक्रममा हालसम्म ३२ जना पक्राउ परेका छन् भने १८ जना अझै फरार छन् । पक्राउ पर्नेमा त्रिभुवन अन्तर्राष्ट्रिय विमानस्थल भन्सार कार्यालयका ८ कर्मचारी, ४ भन्सार एजेन्ट, ३ कार्गो एजेन्ट, ट्याक्सी चालक, भाषा अनुवादक, कम्पनी खोल्ने २ जना, सामान व्यवस्थापक दुई र सुन कारोबारमा संलग्न ११ जना छन् ।
पक्राउ परेकाहरुविरुद्ध भन्सार ऐन, संगठित अपराध निवारण ऐन, नेपाल राष्ट्र बैंक ऐन, मुलुकी अपराध संहिताको एकीकृत कसुर, नागरिक ऐन, राहदानी ऐन र अध्यागमन ऐन विपरितको कसुर गरेको आरोपमा मुद्दा दर्ता गर्न सीआईबीले मागदाबी गर्दैछ । सीआईबी प्रमुख बज्राचार्यका अनुसार आरोपीविरुद्ध २ अर्ब ५० करोडको मागदाबी गरिनेछ ।
