सेयर लगानीकर्तालाई सचेत बनाउनुपर्ने छ : अर्थमन्त्री
साझा परिवेश
सोमवार, अशोज १५, २०८० ११:0७
सीमित व्यक्तिका कारण सेयरबजार प्रभावित
बजार घट्दा लगानीकर्ता निराश
बजारलक्षित केही निर्णय आउलान् भन्ने आश
काठमाडौं ।।
अर्थमन्त्री डा. प्रकाशशरण महतले सीमित व्यक्तिका कारण सेयरबजार प्रभावित भएको बताएका छन् । सोमबार काठमाडौंमा ‘विश्व लगानीकर्ता सप्ताह २०२३’ को उद्घाटन कार्यक्रममा उनले लगानीकर्तालाई सचेत बनाउनुपर्नेमा जोड दिए । “सीमित व्यक्तिले अहिले पनि बजारमा खेल्ने गरेका छन् । सबैले बजार बुझेका हुँदैनन्,” उनले भने, “पुँजीबजारको विषयमा सबैलाई ज्ञान नहुने भएकाले चेतना फैलाउन आवश्यक छ । सूचनाको क्रान्तिले अवसर ल्याएको छ । यसको उपयोग गर्नुपर्छ ।”
बजार घट्दा लगानीकर्ता निराश भएको उनले बताए । केही दिनमै बजारलक्षित निर्णय गरिने उनको भनाइ छ । “बजार अहिले घट्ने गरेको छ । कतिपयको नीतिका कारणले पनि हो । बजारलक्षित केही निर्णय आउलान् भन्ने मैले आशा लिएको छु,” उनले भने । पछिल्लो समय ब्रोकरको संख्या बढ्दा आमलगानीकर्तालाई फाइदा भएको मन्त्री डा. महतले बताए ।
