स्वास्थ्यकर्मीको रक्षा गर्नुपर्छ, सम्झौता गरिएको २४ घण्टा नबित्दै आक्रमण हुनु दुःखद : महामन्त्री गगन

• महामन्त्री गगनकुमार थापाले स्वास्थ्य संस्थाको क्षमता बढाउनुपर्नेमा जोड
• “स्वास्थ्य संस्थाको सेवा प्रवाह क्षमता बढाउन आग्रह  
• मन्त्रालयमा धुलो लागेर बसेको खाका, प्रमलाई पढ्न अनुरोध 
• सम्झौता गरिएको २४ घण्टा नबित्दै स्वास्थ्यकर्मीमाथि आक्रमण हुनु दुःखद 

काठमाडौं ।।

सत्तारूढ दल नेपाली कांग्रेसका महामन्त्री गगनकुमार थापाले स्वास्थ्य संस्थाको क्षमता बढाउनुपर्नेमा जोड दिएका छन् । मंगलबार प्रतिनिधिसभा बैठकको शून्य समयमा उनले यसका लागि एकीकृत खाकासहितको स्वास्थ्य पूर्वाधार मापदण्ड तयार गरिएको बताए । त्यसलाई एकपटक पढ्न प्रधानमन्त्री पुष्पकमल दाहाल ‘प्रचण्ड’लाई उनले आग्रह गरे ।  “स्वास्थ्य संस्थाको सेवा प्रवाह क्षमता नबढाइ हुँदैन । हामीले एकीकृत खाकासहित एकीकृत स्वास्थ्य पूर्वाधार मापदण्ड बनाएका थियौँ, यसको कार्यान्वयन गरौँ । मन्त्रालयमा धुलो लागेर बसेको होला, प्रमलाई पढ्न अनुरोध गर्दछु,” उनले भने ।

सम्झौता गरिएको २४ घण्टा नबित्दै स्वास्थ्यकर्मीमाथि आक्रमण हुनु एकदमै दुःखद भएको उनले उल्लेख गरे । “आक्रमण हुँदा किन्तु, परन्तु केही नभनी जेल विथआउट बेल हुन्छ भन्ने हुँदैन । अनि, कुनै पनि उपचारको सन्दर्भमा उपभोक्तहरूलाई गुनासो हुन्छ भने यसको वैधानिक सम्बेधन हुन्छ भन्ने भर हुँदैन । यस्तो घटना दोहोरिरहन्छ,” उनले भने, “घटना हुन्छ, आन्दोलन हुन्छ, सम्झौता हुन्छ । तर, कार्यान्वयन हुँदैन । यो चक्र तोड्ने हो भने एकपटक नेपाल सरकारले नेपाल मेडिकल एसोसिएसनसँग र स्वास्थ्यकर्मीहरूको संघर्ष समितिसँग गरेको सम्झौताको अक्षरशः कार्यान्वयन गरोस् ।” उनले सम्झौता कार्यान्वयन गर्न सांसदको भूमिका आवश्यक परे त्यो प्रदान गर्न तयार रहेको बताए ।

• संसद विघटन