वर्षासँगै परेको असिनाले बैतडीका विभिन्न स्थानमा बाली सखाप
पाकेर भित्र्याउन तयारी गरेको बाली नष्ट गरेपछि किसान चिन्तित
दिनभरि मौसम सफा रहे पनि साँझपख वर्षा
बैतडी ।।
वर्षासँगै परेको असिनाले बैतडीका विभिन्न स्थानमा बाली सखाप पारेको छ । आइतबार बेलुका परेको असिनापानीले डिलाशैनी, दोगडाकेदार, सिगास गाउँपालिकासहित पुर्चौडी नगरपालिकालगायत स्थानमा बाली नष्ट गरेको हो । असिनापानीले पाकेको धान, भटमास, कोदो र तरकारी नष्ट गरेको डिलाशैनी–७ का मदन धामीले जानकारी दिए ।
पाकेर भित्र्याउन तयारी गरेको बाली नष्ट गरेपछि किसान चिन्तित बनेका छन् । धान र भटमासका साथै किसानले आफ्नो खेतमा लगाएका सबै तरकारी समेत असिनापानीले नष्ट गरेको छ । दिनभरि मौसम सफा रहे पनि साँझपख वर्षा भएको थियो । वर्षाका कारण खरफागलामा काटेर सुकाएको खर घाँस समेत क्षति भएको दोगडाकेदारकी अन्जु भाटले बताइन् । हिउँदमा पशुचौपायालाई खुवाउन अहिले सबै खरफागालाको घाँस काटेर सुकाउने गरिन्छ ।
