आईसीसी टी-ट्वेन्टी विश्वकप एसिया क्षेत्र छनोट : विश्वकप पुग्न नेपाल-यूएईबीच प्रतिस्पर्धा

काठमाडौं । आईसीसी टी-ट्वेन्टी विश्वकप एसिया क्षेत्र छनोट फाइनलको दोस्रो सेमिफाइनलमा आज संयुक्त अरब इमिरेट्स (यूएई) सँग नेपालले प्रतिस्पर्धा गर्दै छ ।

मूलपानी मैदानमा हुने खेलमा जित दर्ता गर्ने टिम विश्वकपका लागि छनोट हुनेछ । आगामी टी-ट्वेन्टी विश्वकप अर्को वर्ष अमेरिका र वेस्ट इन्डिजमा हुँदै छ । आज त्यो विश्वकपका लागि दुई टिमको टुंगो लाग्नेछ । खेल बिहान ११ बजे सुरु हुनेछ ।

यूएईलाई हराएर नेपाल विश्वकपमा स्थान सुरक्षित गर्न चाहन्छ । पछिल्लो समय नेपालले निकै महत्त्वपूर्ण खेलहरुमा यूएईलाई विपक्षीका रुपमा पाएको छ । यूएईसँग नै नेपालले लिग २ को अन्तिम खेल र प्रिमियर कपको फाइनल पनि खेलेको थियो । ती दुवै खेलमा नेपाल विजयी भएको छ । तर एक साताअघि मात्र त्रिकोणात्मक सिरिजको फाइनलमा यूएईसँग पराजित नेपाल अब चिरपरिचित प्रतिस्पर्धीलाई हराउँदै विश्वकपमा पुग्न चाहन्छ ।

नेपालको ओपनिङ जोडीले डेढ वर्षपछि ५० रनभन्दा धेरै साझेदारी गरेको थियो । आजको खेलमा पनि ओपनिङ पार्टनरसिपको धेरै आवश्यकता छ । त्यसैगरी मिडिल ओभरबाट खेललाई अन्तिमसम्म लैजान कुशल मल्ल, रोहित पौडेललाई दबाब हुनेछ ।

यूएईका कप्तान मोहम्मद वासिम सानदार लयमा छन् । विश्वकप पुग्न नेपाली बलरहरुले उनलाई रोक्न आवश्यक हुनेछ । जहुर खान र जुनैद सिद्दिकीको पेसले नेपाली ब्याटरहरुलाई चुनौती दिन सक्छ । स्पिनर आयन खान पनि राम्रो लयमा छन् । आसिफ खान, वृत्य अरविन्द र बासिल हामिदको प्रदर्शनमा अंकुश लगाउन सके विश्वकपको नेपालको यात्रा सहज हुनेछ ।

टी-ट्वेन्टी आईमा नेपाल र यूएईबीच हालसम्म ८ खेल भएका छन् । नेपाल ४ खेलमा विजयी हुँदा ४ खेलमा पराजित भएको छ ।

मूलपानी मैदान स्पिनर्सलाई सहयोग गर्ने किसिमको छ । त्रिवि मैदानको तुलनामा यो मैदानमा केही छोटो बाउन्ड्री हुनेछ ।

आजको अर्को सेमिफाइनल खेल त्रिवि क्रिकेट मैदानमा ओमान र बहराइनबीच प्रतिस्पर्धा हुनेछ । यस खेलको विजेताले पनि विश्वकपमा स्थान बनाउनेछ ।

• संसद विघटन