आर्थिक चुनौतीलाई देखाउँदै आजियाटाले गर्यो नेपालबाट बाहिरिने घोषणा
साझा परिवेश
बुधबार, मंसिर १३, २०८० १६:२६
काठमाडौँ । निजी दूरसञ्चार सेवा कम्पनी एनसेलको मातृ कम्पनी आजियाटाले नेपालबाट आफ्नो लगानी झिक्ने घोषणा गरेको छ । मलेसियन दूरसञ्चार कम्पनी आजियाटाले नेपालको पछिल्लो आर्थिक दृश्य थप चुनौतीपूर्ण देखिएको बताउँदै आफ्नो लगानी झिक्न लागेको जनाएको हो ।
बुधबार एक सार्वजनिक सूचना जारी गर्दै कम्पनीले आफ्नो स्वामित्वको सेयर बेचर छिट्टै नेपालबाट बाहिरिन चाहेको बताएको छ । यसका लागि नेपालस्थित नियामक निकायलाई समेत जानकारी गराइसकिएको एनसेलद्धारा जारी विज्ञप्तिमा बताइएको छ ।
नेपालबाट बाहिरिने निर्णयले आजियाटालाई थप मजबुत बनाउने र दीर्घकालीन रुपमा लगानीकर्तालाई फाइदा हुने विश्वास कम्पनीले व्यक्त गरेको छ ।
८ वर्ष अगाडी आजियाटाले टेलियासोनेराबाट एनसेलको स्वामित्व किनेको थियो । जसमध्ये ८० प्रतिशत सेयर स्वामित्व मलेसियन दूरसञ्चार कम्पनी आजियाटाको रहेको छ भने बाँकी २० प्रतिशत सेयर नेपालका विभिन्न कम्पनी तथा व्यक्तिको नाममा रहेको छ ।
सोही ८० प्रतिशत सेयर बेचर आजियाटा नेपालबाट बाहिरिन चाहेको हो ।
