जेलबाट छुटेका खाँण आज पार्टी केन्द्रीय कार्यालय पुगे
साझा परिवेश
शुक्रबार, पुस १३, २०८० १२:३३
खाँण बैठकमा सहभागी हुन शुक्रबार सानेपा पुगे
करिब सात महिना जेलमा बसे
उनीविरुद्धको मुद्दा अन्तिम किनारा लाग्न बाँकी
काठमाडौं ।।
नेपाली कांग्रेसका केन्द्रीय सदस्य बालकृष्ण खाँण बैठकमा सहभागी हुन शुक्रबार सानेपा पुगेका छन् । पार्टी केन्द्रीय कार्यालयमा जारी केन्द्रीय कार्यसमितिको बैठकमा सहभागी हुन उनी त्यहाँ गएका हुन् । नक्कली भुटानी शरणार्थी प्रकरणमा मुछिएका उनी करिब सात महिना जेलमा थिए । जेलबाट हालै धरौटीमा रिहा भएका थिए ।
जेलबाट छुटेपछि पहिलोपटक केन्द्रीय समितिको बैठकमा सहभागी हुन उनी सानेपा पुगेका हुन् । कांग्रेसको जारी बैठक बिहीबार (हिजो)देखि सुरु भएको हो । पहिलो दिन खाँण बैठकमा अनुपस्थित थिए । दोस्रो दिनको बैठक सुरु भएको छ । उनीविरुद्धको मुद्दा विचाराधीन नै छ । अन्तिम किनारा लाग्न बाँकी छ ।
