झापामा सात दिने भूतपस्यामा बसे मनोक्रान्ति साधक लिम्बू
साझा परिवेश
आइतवार, चैत्र १८, २०८० 0८:२३
बिर्तामोड । मनोक्रान्तिका एक साधक सात दिने भूतपस्यामा बसेका छन् । झापा कमल गाउँपालिका ७ का लिम्बू कनकाई नगरपालिकाको दुर्गापुरस्थित फक्ताङलुङ एजुकेशन फाउण्डेसनको प्राङ्गणमा भूतपस्यामा बसेका हुन् ।
शनिबार दिनको तीन बजे मनोक्रान्तिका साधक गजेन्द्रबहादुर नेम्बाङले लिम्बूलाई तपस्यामा बसाएका थिए । ९ फिट गहिराइ र ९ फिट चौडाइको खाडलमा लिम्बूले सात दिन तपस्या गर्ने बताइएको छ । मानव जीवनमा आइपर्ने समस्याहरुको सामना गर्दै नेतृत्व क्षमता विकास गर्ने उद्धेश्यले भूतपस्या गर्न लागेको लिम्बूले जानकारी दिए ।
खाडल भित्र पराल विच्छ्याएर त्यसमाथि म्याट ओछ्याइएको छ भने एउटा व्ल्याङ्केट राखिएको छ । लिम्बूले खानका लागि पानीमात्र राखिएको छ भने पिसाब गर्नका लागि एउटा सानो भाँडो राखिएको छ । भित्तामा योगी विकासानन्दको फोटो झुण्ड्याइएको छ । कुनै अवरोध सिर्जना भए इलेक्ट्रिक बेल राखिएको छ ।
भूतपस्यामा बसेका लिम्बूलाई २३ गते दिनको तीन बजे डा. योगी विकासानन्दले जुस पिलाएर तपस्या अन्त्य गराउने कार्यक्रम रहेको विश्व परिवार अन्तर्राष्ट्रिय विभागका संयोजकसमेत रहेका नेम्बाङले जानकारी दिए ।
