प्रहरीहरुले जागिर छाडेर जानेहरुको संख्या बढ्दै गएपछी प्रहरी प्रधान कार्यालयले मातहतका कार्यालयहरूलाई कर्मचारीहरूको राजीनामा स्वीकृत नगर्न निर्देशन दिएको छ। यतिबेला सरकार विरुद्ध भइरहेका विभिन्न आन्दोलन, प्रदर्शनलगायतलाई लक्षित गर्दै प्रहरी प्रधान कार्यालयले कर्मचारीहरुको राजीनामा स्वीकृत नगर्न निर्देशन दिएको छ।
अब प्रधान कार्यालयको यो निर्देशनसँगै अर्को आदेश नभएसम्म राजीनामा स्वीकृत हुने छैन।
हालसातै काठमाडौं केन्द्रित भएर विभिन्न आन्दोलन र प्रदर्शन भएका थिए। अहिले पनि शिक्षक, आवासीय चिकित्सक, लगायत अन्य संघ, संगठन, संस्था र समूहका आन्दोलन जारी नै छन्। राजावादीहरुले गरेको प्रदर्शन हिंसात्मक बनेपछि अहिले आन्दोलन र प्रदर्शनमा ठूलो मात्रामा प्रहरी खटाइने गरिएको छ। शिक्षक आन्दोलन र रास्वपा तथा माओवादीको आन्दोलनमा पनि खटाइने सुरक्षाकर्मीहरुको संख्या बढिरहेको छ। त्यसैकारण पनि प्रहरीले राजीनामा दिन पाउने छैनन् । तर १६ वर्ष पेन्सन अवधि बनाउन जोड गरिरहका सुरक्षा अंगमा कार्यरत तल्लो तहका कर्मचारीहरु बेलैमा जागिर छाड्ने र अर्को पेशामा संलग्न हुन थालेका छन् ।
