काठमाडौं : सत्तारुढ नेकपाका दुई अध्यक्षले एक अर्कालाई गम्भीर आरोप लगाउँदै छुट्टाछुट्टै राजनीतिक प्रस्ताव पेस गरेपछि बढेको विवाद साम्य पार्न नेताहरुले गरेको प्रयास गरे पनि सफल हुन सकेको छैन । शुक्रबार दिनभर नेताहरुले सहमतिको लागि प्रयास गरे पनि दुवै पक्ष आ-आफ्नै अडानमा छन् ।
अध्यक्ष एवं प्रधानमन्त्री केपी शर्मा ओली बैठक स्थगित गरेर अनौपचारिक छलफलबाट सहमति खोज्नुपर्ने पक्षमा हुनुहुन्छ । तर अर्का अध्यक्ष पुष्पकमल दाहाल प्रचण्ड र माधवकुमार नेपाल पक्ष भने बैठकबाटै टुङ्ग्याउनुपर्ने अडानमा छन् । सहमति जुटाउन र आवश्यक तयारी गर्न भन्दै तीन दिनको लागि स्थगित भएको सचिवालय बैठक शनिबार बस्दै छ ।
बुधबारको सचिवालय बैठकमा ओली अनुपस्थित हुनुहुन्थ्यो । ओलीलाई बैठकमा उपस्थित हुन आग्रह गर्दै बैठक शनिबारसम्मको लागि स्थगित गरिएको हो । तर शनिबारको बैठकमा पनि ओली उपस्थित हुने, नहुने टुंगो लागेको छैन ।
ओलीले बैठक स्थगित गरेर अनौपचारिक छलफलमा जोड दिनुभएको छ भने प्रचण्ड-नेपाल समूह शनिबारको सचिवालय बैठकमार्फत सबै विषय स्थायी कमिटीमा प्रवेश गराउने तयारीमा छ । ओली निकट नेताहरूले प्रचण्डलाई भेटेर बहुमत-अल्पमतको प्रक्रियाबाट अगाडि बढ्दा पार्टी एकता भंग हुने भएकाले संवादबाट सहमति खाेज्न आग्रह गरेका छन् ।
तर, प्रचण्डले भने बैठकबाटै सहमति खोज्नुपर्ने बताउनुभएको छ । सचिवालय सदस्य एवं उपप्रधानमन्त्री इश्वर पोखरेलले शुक्रबार र महासचिव विष्णु पौडेल र संसदीय दलका उपनेता सुवास नेम्वाङले बिहीबार प्रचण्डसँग खुमलटारमा भेटवार्ता गरेका थिए ।
उनीहरूले केही दिन बैठक रोकेर छलफलमा बस्न प्रस्ताव गरेका थिए । दुई अध्यक्षले सँगै बसेर छलफल गर्दा दुई छुट्टाछुट्टै प्रस्ताव थाती राखेर साझा प्रस्ताव ल्याउने अवस्था बन्ने र भदौ २६ गतेको स्थायी कमिटीको निर्णय कार्यान्वयन गर्दै महाधिवेशन सम्पन्न गर्ने नै संकट समाधानको विकल्प हुने ओली निकट नेताहरुको भनाइ थियो । तर, प्रचण्डले भने ओलीले साँच्चै सहमति खोजेको हो भने सचिवालय बैठकमा उपस्थित हुनुपर्ने जवाफ दिनुभएको थियो । प्रचण्डको प्रस्ताव फिर्ता हुनुपर्ने र माफी मागेपछि मात्रै बैठकको औचित्य हुने ओलीको अडान छ ।
ओलीले सङ्क्रमणकालीन कमिटीबाट बहुमत-अल्पमतका आधारमा निर्णय हुन नसक्ने मत पनि राख्नुभएको छ । प्रचण्ड-नेपाल पक्षले भने दुवै अध्यक्षको प्रतिवेदनलाई कमिटीमै छलफल गरेर अगाडि बढ्ने अडान लिएका छन् । कमिटीले गर्ने जुनसुकै निर्णय ओलीले मान्नुपर्ने उनीहरूको अडान छ ।
ओलीले प्रधानमन्त्री वा अध्यक्षमध्ये एक पद छोड्नुपर्ने पनि उनीहरुको अडान छ । बुधबारको सचिवालय बैठकले पार्टीमा उत्पन्न विवाद समाधानका लागि अनौपचारिक र औपचारिक दुवै तहमा नेताहरूबीच संवाद अघि बढाउने, २० गते सचिवालय र २१ गते स्थायी कमिटी बैठक बोलाउने निर्णय गरेको थियो ।
साभार :- उज्यालो
