ओखलढुंगा / ओखलढुंगाको मोलुङ गाउँपालिका ७ तालकोटमा विभिन्न पार्टी परित्याग गरी ३ दर्जन बढी जनता समाजवादी पार्टी नेपालमा प्रवेश गरेका छन् । क्रान्तिकारी माओवादी लगायत एमाले, कांग्रेस परित्याग गरी दर्जनौ नेता कार्यकर्ता जसपामा प्रवेश गरेका हुन् ।
मोहन वैद्य नेतृत्वका माओवादी क्रान्तिकारीका खिजीदेम्बा इन्चार्ज तथा शेर्पा मुक्ति मोर्चा नेपालका जिल्ला अध्यक्ष मोलुङ ७ कातिकेका गोम्बु शेर्पा लगायत दर्जनौलाई जनता समाजवादी पार्टीमा जसपा प्रदेश सदस्य गम्बु शेर्पाले पार्टीमा स्वागत गरे । पार्टी पत्यिाग गर्नुपूर्व शेर्पाले क्रान्तिकारी माओवादीलाई सिद्धान्तबाट विचलित भएको, अस्पष्ट नीति, नेतृत्वमा भ्रष्टिकरण भएको आरोप लगाए । प्रेस नोट जारी गर्दै शेर्पाले पार्टीले स्थानीय तह निर्वाचन २०७९ र प्रतिनिधी तथा प्रदेशसभा निर्वाचन २०७९ लाई वहिष्कार गर्ने जस्ता गलत निर्णयप्रति असन्तुष्टि समेत व्यक्त गरेका छन् ।
त्यस्तै, एमाले पार्टी परित्याग गरी भिम बहादुर विक लगायतले पनि जसपामा प्रवेश गरेका छन् । उनीहरुले पुरानो पार्टीबाट परिवर्तनको अपेक्षा गर्न नसक्ने, एमाले, कांग्रेस पार्टीहरु व्यक्तिगत स्वार्थ, नेतृत्वमा भ्रष्टिकरण र उत्पीडित वर्गमाथि थिचोमिचो गर्न उद्त रहेको भन्दै जसपा प्रवेश गरेको जनाइएको छ । तालकोट बजारमै आयोजित कार्यक्रममा प्रदेश सदस्य तथा खिजीदेम्बा गाउँपालिका अध्यक्ष गम्बु शेर्पाले मोलुंग गाउँपालिका वडा नं. ७ तालकोटमा स्थापित पार्टीको वडा कार्यालय समेत उद्घाटन गरेको वडा समिति अध्यक्ष दामी भोटे शेर्पाले जानकारी दिए ।
