नेपालको राम्रो सुरुआत, तीन विकेट गुमाएर पीएनजीले बनायो ५७ रन
साझा परिवेश
सोमवार, फाल्गुन २९, २०७९ ११:१२
काठमाडौं ।
आईसीसी विश्वकप क्रिकेट लिग २ को अन्तिम त्रिदेशीय एकदिवसीय शृंखलामा पीएनजीविरुद्ध राम्रो सुरुआत गरेको छ। त्रिवि क्रिकेट मैदानमा टस जितेर फिल्डिङ रोजेको नेपालले १६ ओभरमा ५७ रन खर्चिएर तीन विकेट लिएको छ।
नेपालका लागि सन्दीप लामिछानेले दुई ओभरमा सात रन खर्चिएर एक विकेट लिएका छन्। यस्तै,ललित राजवंशीले तीन ओभरमा पाँच रन खर्चेर एक मेडनसहित एक विकेट लिएका छन्।
पाँच ओभरमा २२ रन खर्चिएका करण केसीले एक मेडनसहित एक विकेट लिए। पीएनजीका ओपनर किप्लिन डोरिगा दुई, हिरी हिरी १४ र सेसे बाउ १८ रन जोडेर पभिलियन फर्किसकेका छन्।
घरेलु मैदानमा लिग २ को अन्तिम शृंखला खेलिरहेको नेपाल आजको खेलमा जित निकाल्दै शीर्ष तीनमा पुग्ने सम्भावना कायम राख्न चाहन्छ।
नेपालले आज र बिहीबार हुने यूएईविरुद्धको खेलमा जित निकाले शीर्ष तीनमा रहँदै अर्को वर्ष भारतमा हुने एकदिवसीय विश्वकपको ग्लोबल छनोटमा स्थान बनाउने छ।
आइतबार यूएईलाई एक सय ७७ रनले पराजित गर्दै नेपालले एकदिवसीयमा मान्यता आगामी चार वर्षका लागि जोगाइसकेको छ।
