सिमकोट । डेढ महिनापछिको हिमपातले हिमाली जिल्ला हुम्लाका किसानहरु खुसी भएका छन्। खडेरीका कारण सुक्न लागेको जेठासी बाली सुक्न नपाउने र कात्तिके बाली लगाउन सहज हुने भएपछि हिमपातबाट किसान खुसी भएका हुन्।
स्याउ फारमका लागि डेढ सय बोट स्याउका बिरुवा लगाएका किसान दल भण्डारीले हिमपातले किसानका लागि राहत मिलेको बताए। लामो समय खडेरी परेको कारण लगाएका बिरुवा सुक्न थालेको समयमा हिमपात र वर्षा भएपछि अब बिरुवा हुर्काउन सहज हुनेछ।
किसान टक्क शाहीले कात्तिके बाली लगाउन कठिन भइरहेकोवेला परेको हिमपातले बीउ छर्न, खनजोत गर्न सहज भएको बताए। किसानहरु खडेरी परेको कारण कात्तिके बाली लगाउन नसकिने चिन्तामा परिरहेको बेला हिमपातले ठूलो राहत पर्याएको छ।
प्रमुख जिल्ला अधिकारी श्रीनाथ पौडेलले हिमपात सुुरु भएको जानकारी दिए ।
दिउँसोबाट हिउँ जम्न थालेको र हिउँ पर्ने क्रम जारी रहेकोले चिसोबाट जोगिन प्रमुख जिल्ला अधिकारी श्रीनाथ पौडेलले सर्वसाधारणलाई आग्रह गरेका छन्।
गाउँपालिकाको छोबाखोर पञ्चमुखी, लब्लीडाँडा, रलिङगुम्बा, चाङ्ला हिमाल र नाम्खा गाउँपालिकाको लिमी, हिल्सा, नारालेक, यारी, मुचु, चाला, न्यालु लेकमा बढी हिमपात भएको छ। यसवर्षको यो तेस्रो हिमपात हो।
