June 13, 2024 | बिहिबार, जेष्ठ ३१, २०८१
सुचनाहरु
श्री केश तेल गुणस्तरीय रहेको उत्पादन कम्पनीको दावी घट्यो सुनको मूल्य, आज कतिमा हुँदैछ कारोबार ? कस्तो रहला आजको मौसम ? प्रतिनिधि सभाको बैठक दुई दिन स्थगित मोदीको शपथ ग्रहणमा भाग लिन प्रधानमन्त्री दाहाल आज भारत जाँदै दुर्ब्यशन विरुद्ध रङ्गभर्दै गौरादह जेसीज सुनको मूल्यमा नयाँ कीर्तिमान टी-२० विश्वकप: नामिबियामाथि स्कटल्याण्ड ५ विकेटले विजयी गौरादहमा खुल्यो “दर्पण कला सँसार”…… गृहमन्त्रीले गिरीबन्धुको फाइल खोल्ने होइन, बोल्नपनि सक्नुहुन्न : विश्वप्रकाश शर्मा मोदीको शपथ ग्रहण समारोहमा जाने तयारीमा प्रधानमन्त्री प्रचण्ड सुनको मुल्य अहिलेसम्मकै उच्च बालेनलाई न्यूरोडको फुटपाथ बढाउन दिनुपर्छ, केन्द्रको हस्तक्षेप बन्द गर- महामन्त्री शर्मा प्रतिनिधिसभाको बैठक आज बस्दै, यस्तो छ आजको कार्यसूची स्रोत नखुलेको ६९ लाखसहित चारजना चिनियाँं नागरिक पक्राउ टी–२० विश्वकप क्रिकेटमा अस्ट्रेलियासँग ओमान ३९ रनले पराजित सहकारी ठगि छानबिन संसदीय समितिको पहिलो बैठक शुरु विपद क्षेत्रको रिपोर्टिङमा जाने पत्रकार र स्वयंसेवकलाई तालिम दिइने सेयर बजारमा ५.५८ अंकको गिरावट हावाहुरी र चट्याङसहित पानी पर्ने सम्भावना

राजतन्त्रको पक्षमा माहोल बनाउन पूर्वराजाको सुझाव, अब के गर्छ राप्रपा ?

  • साझा परिवेश
  • बिहिबार, चैत्र ९, २०७९ १३:५५
राजतन्त्रको पक्षमा माहोल बनाउन पूर्वराजाको सुझाव, अब के गर्छ राप्रपा ?
काठमाडौँ । पूर्वराजा ज्ञानेन्द्र शाहले राप्रपालाई शीर्ष नेताहरूलाई बोलाएर राजतन्त्रको पक्षमा माहौल बनाउन सुझाव दिएका छन् । झापामा भेट्न पुगेका नेताहरूलाई पूर्वराजाले राजतन्त्रको पक्षमा राप्रपा प्रमुख शक्ति रहेकाले सो पार्टीले एजेण्डा स्थापित गर्न पहलकदमी लिनुपर्ने सुझाएका हुन् ।

भेटको क्रममा देशको वर्तमान राजनीतिक परिस्थिति बिग्रँदै गएकाले अब पनि राजावादी शक्ति चुप लागेर बस्न नहुने धारणा पूर्वराजाले राखेका थिए । स्रोतका अनुसार भेटका क्रममा पूर्वराजाले सुरुमा वर्तमान राजनीतिक परिस्थिति बिग्रेको भन्दै चिन्ता जाहेर गरेका थिए । राप्रपा अध्यक्ष राजेन्द्र लिङ्देन, निर्देशक समितिका अध्यक्ष डा प्रकाशचन्द्र लोहनी, उपाध्यक्ष रवीन्द्र मिश्र र महामन्त्री डा धवलशमशेर राणासहित अन्य केही राजावादी सहभागी उक्त भेटमा पूर्वराजाले अब चुप लागेर बस्न नहुनेमा जोड दिएका थिए ।

देशमा भ्रष्टाचार बढेको, लोकतान्त्रिक मूल्य र मान्यता हराउँदै गएको, आर्थिक रूपमा देश भयानक सङ्कटतर्फ अघि बढेको धारणा पूर्वराजाको थियो । बेथितिबारे आक्रोशित मुद्रामा प्रस्तुत भएका पूर्वराजाले हिन्दुराष्ट्र पुनर्स्थापनालगायतका सवालमा दुर्गा प्रसाईँको नेतृत्वमा जारी आन्दोलनको बारेमा समेत आफ्नो धारणा राखेका थिए । प्रसाईंको आन्दोलनले मात्रै निकास दिन नसक्ने भन्दै उनले राप्रपासहित सबै मिलेर आन्दोलनमा होमिन सुझाव दिएको स्रोतको भनाइ छ । स्रोतका अनुसार पूर्वराजाले राप्रपाले हिन्दुराष्ट्र र राजतन्त्रको पक्षमा आन्दोलनको आँधीबेहरी सिर्जना गर्नुपर्ने आशयसहितको धारणा समेत राखेका थिए ।

चार नेतासँग भेटअघि निर्देशक समितिका अध्यक्ष लोहनीले शाहसँग छुट्टै भेटवार्ता समेत गरेको बताइएको छ । शाहसँग मंगलबार साँझ करिब २ घण्टा लोहनीले छुट्टै भेटवार्ता गरेको स्रोतको भनाइ छ ।

राप्रपाका महामन्त्री डा धवलशमशेर राणाले पूर्वराजासँगको भेटपछि आफूहरू खुसी रहेको प्रतिक्रिया दिए । पूर्वराजाले वर्तमान बेथितिप्रति चिन्ता व्यक्त गरेको र राजतन्त्रको पक्षमा मिलेर अघि बढ्न सुझाव दिएको उनको भनाइ छ । उनले पार्टीले आफ्नो एजेण्डा र मूल्यमान्यताका लागि सडक र सदन दुवैतर्फबाट आन्दोलन गर्ने उल्लेख गर्दै त्यसमा पूर्वराजाको पनि साथ रहने विश्वास व्यक्त गरे ।

‘जुन संस्थालाई हामीले पुनर्स्थापना गर्न खोजेका छौँ । त्यो संस्थाको समर्थन त पक्कै होला नि’, उनले रातोपाटीसँग भने, ‘राजालाई भेटेपछि हामी खुसी छौँ ।’

पूर्वराजासँगको भेटबारे राणासँग गरिएको संक्षिप्त कुराकानी:

तपाईंहरुले पूर्वराजासँग सामूहिक भेटवार्ता गर्नुभयो, के विषयमा छलफल भयो ?

यो स्वाभाविक भेटवार्ता हो । हामीले मानेको, अगाडि सारेको र पुनर्स्थापना गर्न खोजेको संस्थाको प्रमुखसँग भेट्ने, अपडेट गराउने तथा उहाँहरूको पनि राय सुझाव सुन्न भेटघाट गर्न गएका हौँ । यही सन्दर्भमा कुराकानी भएको हो ।

राजसंस्थाले राजनीति गर्ने होइन । सबैको अभिभावकको रूपमा राजा रहनुपर्छ भन्ने हाम्रो भनाइ हो र राजाले पनि आफू प्रत्यक्ष राजनीतिमा आउने कुनै कुरा गर्नुभएको छैन ।

भेटमा पूर्वराजाले के भन्नुभयो ?

आम जनताको, हाम्रो र राजाको धारणा त समान हो । बेथिति नै बेथितिमा देश छ । देशै डुब्न लागेको अवस्था छ । देशको आर्थिक परिस्थितिले देशै श्रीलङ्का हुने हो कि भन्नेदेखि हरेक क्षेत्रमा अन्योल र समस्याग्रस्त छ । त्यसमा हामी र राजा सबै चिन्तित छौँ । उहाँ पनि चिन्तित नै हुनुहुन्छ । पूर्व हेड अफ स्टेटले देशप्रति चिन्ता गर्नु त स्वाभाविक पनि हो ।

त्यस्तै राजाले राप्रपालाई मिलेर अगाडि बढ भनेर सल्लाह दिनुभएको छ । यो देशको बेथितिमा तपाईंहरुले मिलेर देशलाई अगाडि बढाउनुस् भनेर सल्लाह दिनुभएको छ । एजेण्डालाई अगाडि बढाऊ भनेर भन्नुभएको छ । तर, राजा राजनीतिभन्दा बाहिर हुनुहुन्छ । राजा सबैको साझा हो र राप्रपाभन्दा पनि सबैलाई मिलेर अगाडि जाऊ र यो देशलाई लाइनमा ल्याऊ भन्ने छ । तर, हामीसँग त अलिकति नजिक हुने त भइहाल्यो । हामीले नै त्यो संस्थालाई अगाडि बढाउन खोजेका छौँ । हिन्दुराष्ट्रलाई अगाडि बढाउन खोजेका छौँ । यसकारणले राजालाई प्रत्यक्ष राजनीतिमा सहभागी गराउन हामीले खोजेका पनि होइनौँ र हुन पनि हुँदैन ।

दुर्गा प्रसाईँको आन्दोलनमा राजाको सक्रिय सहभागिता होइन । खाली उहाँले परेवा उडाएर, बत्ती बालेर उद्घाटन गर्नुभएको मात्रै हो ।

तपाईंहरुसँगको भेटमा आफ्नो राजनीतिमा सक्रियताबारे राजाले केही भन्नुभयो कि ?

हामी त्यो चाहेकै छैन । राजसंस्थाले राजनीति गर्ने होइन । सबैको अभिभावकको रूपमा राजा रहनुपर्छ भन्ने हाम्रो भनाइ हो र राजाले पनि आफू प्रत्यक्ष राजनीतिमा आउने कुनै कुरा गर्नुभएको छैन । एउटा पार्टीको मात्रै राजा त होइन नि हामीले त्यो गराउन खोज्दैनौँ र गर्दा पनि गर्दैनौँ ।

दुर्गा प्रसाईँलगायतको आन्दोलनमा राजाको पनि साथ छ भनिन्छ, आन्दोलनबारे तपाईंहरुसँग पनि छुट्टै केही छलफल भयो कि ?

एउटै एजेण्डाका लागि हुने आन्दोलनमा मिलेर त लाग्नै पर्ने हो नि । राजसंस्था खोज्ने, हिन्दुराष्ट्र खोज्नेहरू चार ठाउँमा फिँजिएर हुँदैन, मिल्नुपर्छ भन्ने त स्वाभाविकै हो । तर, दुर्गा प्रसाईँको आन्दोलनमा राजाको सक्रिय सहभागिता होइन । खाली उहाँले परेवा उडाएर, बत्ती बालेर उद्घाटन गर्नुभएको मात्रै हो । यसको गलत व्याख्यामात्रै गरेका हुन् मान्छेहरूले । एजेण्डा र मूल्यमान्यता पुनर्स्थापनाकाल लागि मिलेर अघि बढ्न भनेर पूर्वराजाले भन्नु त स्वाभाविकै हो ।

जुन संस्थालाई हामीले पुनर्स्थापना गर्न खोजेका छौँ । त्यो संस्थाको समर्थन त पक्कै होला नि । राजालाई भेटेपछि हामी खुसी छौँ ।

अब कसरी अघि बढ्नुहुन्छ ?

हामी त प्रस्टै थियौँ, अलिदिन सरकारमा अलमलिएको मात्रै हो । बेथिति नै बेथितिमा रहेको देशलाई केही उकास्न सकिन्छ कि भनेर सरकारमा जाने निर्णय गरेका थियौँ  । तर, त्यो गल्ती रहेछ । अब सरकारमा जान नहुने स्थिति देखियो । किनभने त्यत्रो फितलो मनस्थिति र ढुलमुल चरित्रको नेताहरू एक–एक डेढ–डेढ महिनामा समीकरण फेर्ने खेलमा लागेकाले राप्रपा बाहिर बस्नुपर्छ भन्ने हाम्रो ठहर भयो र सरकार र गठबन्धनबाट हामीले आफ्नो समर्थन फिर्ता लियौँ । अब प्रष्ट छौँ कि हामी सडक र सदन दुवै प्रयोग गरेर हाम्रा मूल्य र मान्यतालाई अगाडि बढाउनेमा प्रयासरत छौँ ।

त्यसो भए आन्दोलनमा कसरी र कहिले जाने तयारीमा हुनुहुन्छ ?

एउटा मनस्थिति सबैको बनिसकेको छ । अब बैठकहरू बसेर आन्दोलन कसरी गर्ने र कुन मोडालिटीमा जाने भनेर पार्टीले बसेर छलफल गर्छौँ । आन्दोलनमा जाँदा सबैसँग मिलेर जाने हाम्रो प्रयास हुनेछ । हाम्रो एजेण्डा र हाम्रो मूल्य र मान्यतालाई स्वीकार्ने सबै पार्टी, शक्ति र व्यक्तिहरूलाई आह्वान गरेर अगाडि बढ्छौँ ।

तपाईंहरुको आन्दोलनमा राजाको पनि समर्थन रहन्छ भन्न खोज्नु भएको हो ?

जुन संस्थालाई हामीले पुनर्स्थापना गर्न खोजेका छौँ । त्यो संस्थाको समर्थन त पक्कै होला नि । राजालाई भेटेपछि हामी खुसी छौँ ।

श्रोत : रातोपाटी डटकम

  • साझा परिवेश
  • बिहिबार, चैत्र ९, २०७९ १३:५५

प्रतिक्रिया

तपाइको प्रतिक्रिया दिनुहोस्