काठमाडौँ । ऊर्जा, जलस्रोत तथा सिँचाई मन्त्री शक्तिबहादुर बस्नेत भारत पुगेका छन् । आइतबार कर्णाटकमा भएको कार्यक्रममा भाग लिन बस्नेत शनिबार नयाँ दिल्ली हुँदै त्यहाँ पुगेका हुन् ।
सो कार्यक्रममा भारतीय प्रधानमन्त्री नरेन्द्र मोदी प्रमुख अतिथि रहेका थिए । भारतीय प्रधानमन्त्री मोदीले सो अवसरमा इन्टरनेशनल बीग क्याट एलायन्सको पनि घोषणा गरे । आज केही उच्च स्तरीय भेटघाट गरेर मन्त्री बस्नेत भोलि नेपाल फर्किने कार्यक्रम रहेको स्रोतले जनाएको छ ।
प्रधानमन्त्री प्रचण्डसँग वन तथा वातावरण मन्त्रालय रहेको छ । सोही मन्त्रालयमार्फत मन्त्री बस्नेत भारत गएको बताइन्छ । निकट भविष्यमा प्रधानमन्त्री प्रचण्डको भारत भ्रमण हुन गइरहेको छ । त्यसको बारेमा पनि मन्त्री बस्नेतले छलफल गर्ने स्रोतको दाबी छ ।
यता नेपालका लागि भारतीय राजदूत नवीन श्रीवास्तव पनि दिल्ली गएर हिजो नै काठमाडौँ फर्केका छन् । प्रधानमन्त्री प्रचण्डको भारत भ्रमणको विषयमा छलफल गरेर उनी नेपाल फर्केको बताइएको छ ।
