मिश्रित निर्वाचन प्रणालीले स्थिर राजनीति हुँदैन : प्रकाशमान सिंह
साझा परिवेश
आइतवार, बैशाख ३, २०८० १७:४२
झापा । नेपालमा जबसम्म मिश्रित निर्वाचन प्रणाली रहन्छ तबसम्म स्थिर सरकार नबन्ने नेपाली कांग्रेसका नेता तथा प्रतिनिधिसभा सदस्य प्रकाशमान सिंहले बताएका छन्।
वीरता जेसीजका पूर्व अध्यक्षहरूको क्लबद्वारा घोषणा गरिने उत्कृष्ट नागरिक सम्मान कार्यक्रममा बोल्दै कांग्रेस नेता सिंहले मिश्रित निर्वाचन प्रणालीको अभ्यासले स्थिर राजनीतिक अवस्था दिन नसक्ने बताए।
संवैधानिक व्यवस्था सोही प्रणालीको भएकाले सोही किसिमको अभ्यासमा अभ्यस्त हुनुको विकल्प नभएको उनको भनाइ छ। यो निर्वाचन प्रणालीबाट कहिलेकाहीँ मात्र बहुमत आउने उनले बताए।
कांग्रेस नेता सिंहले भने, ‘मान्छेहरू राजनीतिक स्थायित्व भएन भन्छन्। मिश्रित निर्वाचन प्रणाली अँगालेपछि कहाँबाट राजनीतिक स्थायीत्व हुन्छ?’
यही संवैधानिक व्यवस्थामा राजनीतिक स्थायीत्व ल्याउन सबै तहबाट प्रयास हुनुपर्ने कांग्रेस नेता सिंहले बताए। उनले तीन तहको सरकारलाई बलियो बनाए मात्र देशमा विकासको अनुभूति गर्न सकिने बताए।
कोभिड महामारीपछिको आर्थिक मन्दीको अवस्थालाई सरकारले आगामी बजेटमा सम्बोधन गर्नुपर्ने उनको भनाइ छ।
