प्रधानमन्त्रीको भारत भ्रमण तयारी तीव्र, साउद बने परराष्ट्रमन्त्री

काठमाडौं । परराष्ट्रमन्त्री नारायणप्रकाश (एनपी) साउदले प्रधानमन्त्री पुष्पकमल दाहाल ‘प्रचण्ड’को भारत भ्रमणको तयारीमा जुट्ने बताएका छन्। परराष्ट्रमन्त्रीको रूपमा आइतबार पद तथा गोपनियताको शपथ ग्रहण गरेका साउदले सिंहदरबारस्थित मन्त्रालयमा पदभार ग्रहणका क्रममा भने, ‘प्रधानमन्त्रीको भारत भ्रमणका बिषयमा मन्त्रालयले काम गरिरहेको छ। म यो बिषयमा सचिव सँगै कर्मचारीसँग ब्रिफिङ लिएर अगाडि बढ्छु।’

मन्त्री साउदले नेपाललाई शान्तिप्रिय लोकतान्त्रिक देशको रूपमा विश्वसामु चिनाउने उद्देश्यतर्फ लाग्ने पनि बताए।
‘नेपालले सबै छिमेकीहरूसँग सौहार्दपूर्ण र शान्तिपूर्ण सम्बन्धलाई कायम राख्नतर्फ म लाग्नेछु,’ उनले भने, ‘नेपाल शान्तिप्रेमी देश हो। छिमेकी राष्ट्रहरूसँग विगतदेखि नै हाम्रो सौहार्दपूर्ण र शान्तिपूर्ण सम्बन्ध रहीआएको छ। हामीले आगामी दिनमा पनि सबै छिमेकी देशहरूसँगको सम्बन्धलाई घनिष्ट बनाउँदै लैजानेछौं। नेपाललाई शान्तिप्रिय लोकतान्त्रिक देशको रूपमा विश्वसामु चिनाउने काम गर्नेछौं।’

राष्ट्रपति र प्रधानमन्त्रीको भारत भ्रमणलाई ध्यानमा राख्दै सत्तारूढ दलले साउदलाई परराष्ट्रमन्त्रीमा नियुक्त गर्ने सहमति गरेको थियो। कांग्रेसका पार्टी सभापति शेरबहादुर देउवाका विश्वसनीय नेताका रूपमा चिनिएका मन्त्री साउदलाई पार्टीभित्रकै धेरै आकांक्षी भित्रबाट सभापति देउवालेनै मन्त्रीका लागि अघि सारेका हुन्।

• संसद विघटन