कोसी प्रदेशका सीमा क्षेत्रमा तस्करी रोक्न प्रहरीको नियमित गस्ती

विराटनगर । नेपाल–भारत सीमा क्षेत्रबाट हुने चोरी–तस्करी नियन्त्रण गर्न कोसी प्रदेशमा नेपाल प्रहरीले सक्रियता बढाएको छ ।
भारतसँगको खुला सीमाका कारण नेपालबाट भारत र भारतबाट नेपालतिर हुँदै आएको तस्करी नियन्त्रण चुनौतीपूर्ण बनिरहेको छ ।
चुनौतीको सामना गर्दै प्रहरीले अवैध चोरी–पैठारी रोक्न विभिन्न निकायसँग समन्वय गरेर काम गरिरहेको हो ।
तस्करी नियन्त्रणलाई प्राथमिकतामा राखेर सीमा क्षेत्र लक्षित गर्दै नेपाल प्रहरीले नियमित गस्ती गर्न थालेको छ ।

तस्करी रोक्न विशेष कार्ययोजना बनाएरै अघि बढेको प्रहरीले हतियारसहित गस्ती सुरु गरेपछि सीमा क्षेत्रबाट सामानको अवैध ओसारपसार हुन नपाएको बताइएको छ ।
विशेष गरेर भारतसँग सीमा जोडिएका कोसी प्रदेशको तराईका जिल्लाहरू झापा, मोरङ र सुनसरीमा प्रहरीले सक्रियता बढाएको छ । नेपाल प्रहरीका उपरीक्षक (एसपी)हरु
झापामा दुर्गाराज रेग्मी, मोरङमा दीपक पोखरेल र सुनसरीमा प्रभुप्रसाद ढकालको नेतृत्वमा प्रहरी छ ।

जिल्ला प्रहरी प्रमुखहरुले सीमा क्षेत्रमा निगरानी बढाउँदै चोरी–तस्करी नियन्त्रण गर्न विशेष टोली परिचालन गरेका छन् । परिचालित प्रहरीले ठूलो परिणामको अवैध सामान बरामद
गर्दै तस्करी नियन्त्रणको प्रयास गरिरहेको हो । सशस्त्र प्रहरीलगायतका निकायसँग समन्वय गर्दै ३ वटै जिल्लाका सिमावर्ती क्षेत्रमा नेपाल प्रहरीले हतियारसहित नियमित गस्ती गरिरहेको छ ।

प्रदेश प्रहरीका निमित्त प्रमुख प्रहरी वरिष्ठ उपरीक्षक (एसएसपी) राजेशनाथ बास्तोलाले राजस्व छली एवं तस्करी रोक्न नाकाहरुमा उच्च सतर्कता अपनाउन निर्देशन दिएसँगै सीमा
क्षेत्रमा सतर्कता बढाइएको हो । उनको निर्देशनसँगै प्रहरीले सीमा क्षेत्र लक्षित २४ घण्टे गस्ती सुरु गरेको छ । झापा, मोरङ र सुनसरीका प्रहरी कार्यालयको निरीक्षण भ्रमणका क्रममा
बास्तोलाले तस्करी नियन्त्रणमा कुनै सम्झौता नहुने उल्लेख गर्दै प्रहरीलाई प्रतिवद्ध भएर जिम्मेवार रूपमा प्रस्तुत हुन निर्देशन दिएका हुन् ।

राजस्व अनुसन्धान र भन्सार कार्यालयसँग समन्वयमा प्रहरीले पछिल्लो १ वर्षको अवधिमा भन्सार छली गरिएका २६ करोड रूपैयाँभन्दा बढीका अवैध मालसामान बरामद गरेको छ ।
२०७९ वैशाखदेखि चैतसम्ममा तस्करीमा प्रयोग गरिएका ७६ वटा सवारीसाधन र तस्करीमा संलग्न ८० जनालाई प्रहरीले नियन्त्रणमा लिएर अनुसन्धान एवं कारबाहीका लागि राजस्व
तथा भन्सार कार्यालयमा बुझाएको छ । प्रहरीका अनुसार तस्करीका सामान ओसारपसार गर्न साइकल, मोटरसाइकल, अटो टेम्पो, पिकअप भ्यान, म्याजिक, ट्याक्टरलगायतका सवारीसाधन प्रयोग हुने गरेको छ ।

चैत महिनामा मात्रै प्रहरीले ७८ लाख ९४ हजार रूपैयाँभन्दा बढीको अवैध सामान बरामद गरेको छ । उक्त अवधिमा प्रहरीले तस्करीमा संलग्न ४ जनासहित एउटा सवारीसाधन
पनि नियन्त्रणमा लिएको छ । प्रहरीले तस्करीका खाद्यान्न, किराना मालसामान, खादमल, लत्ताकपडा, मोटर पार्टस्, सिमेन्ट, पेय पदार्थ, कस्मेटिक सामान, फलफूल, बिजुलीका
सामान, ब्रोइलर कुखुरा, औषधि, स्वास्थ्य सामग्री, माछा तथा नेपालबाट भारततिर लैजान खोजिएका चौपाया पनि नियन्त्रणमा लिएको छ ।

• संसद विघटन